Shillong, Jymmang 22
Kan long ka sien kaba nyngkong eh ïa ki 3 ngut ki nongking-lieng ka Jylla, kata ka Elizabeth Vincent, u Batskhem Nongbak bad u Pynshngaiñ Kurbah kiba la shah jied ban mih -khmat ïa ka ri India ha ka jingïakob kinglieng ki ban long shabar ri.
Ka Elizabeth Vincent kaba na Ribhoi ka la ïoh rung sha ka ICF World Cup ka ban long ha ka nongbah Prague jong ka Czech Republic ha u ‘nai Jylliew mynta u snem. Ki nongjop ha kane ka jingïakob ha kane ka jingïakob kin ïoh ïa ka lad ban ïashim bynta ha Paris Olympics 2024.
Kumba ka long mynta ka Elizabeth, u Batskhem bad u Pynshngaiñ ki la shah jied ban don bynta bad ka kynhun ïalehkai ka ri ka ban leit ïashim bynta ha ka International Canoe Slalom Tournament ka ban long ha Russia ha u Nailur mynta u snem.
Ka Elizabeth kaba dang 26 snem ka rta, kaba la ïoh rung sha ka World Cup, ka la sdang ïa ka jingkilanmet hapoh ka jinghikai ka coach lem bad u kpa jong ka, u Ian Vincent hajan ka shnong Umtham. Kane ka nongïalehkai ka la ïoh ban mihkhmat ïa ka Jylla ha kiba bun ki jingïakob kynthup ïa ka National Games, Malabar River Festival bad ka Tawangchu Tides Festival kaba ha Arunachal Pradesh.
U Batskhem Nongbah uba dang 18 snem ka rta bad u Pynshngaiñ Kurbah uba dang 19 snem karta, ki la ïoh ban ïashim bynta ha ka Khelo India Games 2022. U Batskhem uba na ka shnong Umtham uba la shah hikai ha u Ian Vincent, u la long tang kum u nongbylla, hynrei u don pat ïa ka jingthrang ban pynurlong ïa ki jing-angnud ha ka kam ïalehkai king-lieng.
Katba u Pynshngaiñ uba na Labyrwa u la sdang ban king-lieng naduh ba u dangkhynnah hapoh ka jingai jinghikai u Ian Vincent kum u coach bad u la ïoh ban khur ïa ka takma rupa ha ka Khelo India Games 2022. U la ïoh ruh ka lad ban mihkhmat ïa ka Jylla ha ka Malabar River Festival bad ha ka jingïakob kaba la long ha Madhya Pradesh.
Na ka liang u Myntri Rangbah ka Jylla u Conrad Sangma u la leit ai khublei kitbok kitrwiang ïa kitei ki 3 ngut ki nongkinglieng ha shnong Umtham kaba ha Ribhoi. Ha kane ka jingïalang kaba lyngkot la ïadon lang u Dr. Wilbur Manners, President ka MCA, u Zorba Laloo uba long u dkhot ka MCA lem bad u coach u Ian Vincent.
Ka shnong Umtham kaba ha Ribhoi kala long kawei na ki jingïalehkai king-lieng da kaba pynlong ïa ka Megha Kayak Fest (international white water kayaking competition) bad ruh ïa ka IKCA Selection Trials kaba la long ha ka 18 bad 19 tarik mynta u bnai.
“Ka jingthmu ka jong nga ka long tang ban wan ban pynlut ïa ka por ha kane ka jaka bad phi bad ruh ban ai khublei ïa phi ki nongïalehkai. Kum u Myntri Rangbah nga sngewsarong na ka bynta jong phi halor ka jingïalehkai bha tang ha ka por kaba lyngkot,” la pynpaw u Conrad.
