New Delhi, Jymmang:
Ki pulit jong ka Delhi ha ka sngi Ba-ar ki la kem ïa uwei u briew uba la 41 snem ka rta ïa uba la shah kynnoh ba u la thombor pyrshah da kaba synreit sia ïa u kyrtong jong ka seng Congress uba ïakhun ïa ka ilekshon Lok Sabha u Kanhaiya Kumar ha ka taïew ba la lah, la ïathuh ki pulit.
Uwei na ki heh pulit u la ong ba ïa une uba la shah kynnoh ba la tip kyrteng kum u Ajay Kumar, la kem noh na ka ïingsah jong u kaba don ha New Usmanpur, ka jaka ha kaba la jia kane ka jingjia, ha kaba u la bynrap shuh shuh da kaba ong ba ka la don ka jingtohkti kaba bniah ïa une uba la shah kynnoh ha kaba ïadei bad ka jingjia. Kane ka jingjia ka lajia ha ka 17 tarik, Jymmang ha ka por ba u Kanhaiya Kumar, uba long u kyrtong jong ka kynhun synrop INDIA na North East Delhi konstitwensi, u dang mih shabar jong ka shlem treika jong ka seng AAP kaba don ha New Usmanpur hadien ba ka seng ka la shong jingïalang bad ka Councillor ka thaiñ ka Chhaya Sharma ha kaba ka kynhun jong ki briew ka la tur pyrshah ban thombor ïa u.
Kumba la buh jingmudui da ka Sharma la ong, “Ki la don kumba katto katne ngut ki briew kiba la pyndeng syntiew ha ryngdang jong u Kanhaiya Kumar. Hadien ba la dep ban pyndeng syntiew, ki la don kumba katto katne kiwei pat kiba la synreit da ka sia ïa u Kanhaiya Kumar bad pyrshang ban thombor pyrshah ïa u.” Ka Sarma ka la bynrap shuh shuh da kaba ong ba haba ka la pyrshang ban kylli jingkylli bad tuklar halor kane kine ki briew ki la leh bym salia bad byrngem kylla ïa ka. Ha kaba ïadei bad ka jingmudui jong ka Sarma, ka la don ka ejahar ba la buh pyrshah ïa kine kiba la shah kynnoh hapoh ka kyndon 323, 341, 506 bad 34 jong ka Indian Penal Code, la ong ki pulit. U Ajay u la shahkem na ka ïingsah jong u kaba don ha New Usmanpur ha ka step jong ka sngi Ba-r, la ïathuh u heh pulit.
