Shillong, Jymmang 23
Ka lahduh jong u snem ba la lah, ka West Jaiñtia Hills ka la ioh ban lamkhmat ha ka sngi kaba ar jong ka lympung ïalehkai State Level Inter-School Athletic Meet 2024, katba ka East Khasi Hills ka la wan ba-ar ha ka sngi Palei ha S.A.I Training Centre, Shillong.
Haduh kane ka sngi kaba ar, ka West Jaiñtia ka la ïoh ban khur haduh 19 tylli ki takma, kynthup ïa mar 8 tylli ki takma ksiar bad rupa lem bad 3 tylli ki takma rnong. Ka East Khasi Hills ka la khur 14 tylli ki takma (7 ksiar, 6 rupa bad 1 rnong). Ka East Jaiñtia Hills ka la wan ha ka kyrdan balai da kaba khur 16 tylli ki takma (6 ksiar, 3 rupa & 7 rnong).
Ka South Garo Hills ka la ïoh ban khur 13 tylli ki takma (6 ksiar, 3 rupa & 4 rnong). katba ka Ri Bhoi kaba la wan ha ka kyrdan ba-ar ha u snem ba la lah, mynta ka la ïoh ban bat ïa ka kyrdan basan da kaba khur 15 tylli ki takma (3 ksiar, 3 rupa bad 9 rnong).
Ha ka High Jump jong ka Under- 14 (Boys) u Dalbrobath D. Marak (South West Garo Hills) u la khur ïa ka takma ksiar da kaba u la lah ban kynthih ha ki 1.46 mitar, ïa ka takma rupa la khur da u Leroygadial Lyngdoh Mawnai (Eastern West Khasi Hills) uba la lah ban kynthih ha ki 1.43 mitar bad ïa ka takma rnong la khur da u Niksrangbath D. Shira (South Garo Hills) uba la lah ban kynthih ha ki 1.43 mitar. Ha ka liang ki kynthei la khur ïa ka takma ksiar da ka Fraryca Nongrum (Ri Bhoi) kaba la lah ban kynthih ha ki 1.34 mitat, ïa ka takma rupa la khur da ka Sngibarisha Warjri (Eastern West Khasi Hills) kaba la lah ban kynthih ha ki 1.30 mitar bad ia ka takma rnong la khur da ka Emica Shangpliang (West Khasi Hills) da kaba kynthih ha ki 1.24 mitar.
Ha ka Long Jump jong ka Under-14 (Boys) la khur ïa ka takma ksiar da u Wanchiang K. Marak (West Garo Hills) uba la kynthih ha ki 5.18 mitar, ïa ka takma rupa la khur da u Vincent Phira (West Jaiñtia Hills) uba la kynthih ha ki 5.09 mitar bad ïa ka takma rnong la khur da u Rilamiki Rymbai (East Jaiñtia Hills) da kaba kynthih ha ki 5.04 mitar.
Ha ka Javelin Throw jong ka Under-14 (Girls) ka Leryang G. Marak (South Garo Hills) ka la khur ïa ka takma ksiar da kaba ka la lah ban kawang 26.49 mitar, ïa ka takma rupa la khur da ka Rimiky Kharjahrin (West Khasi Hills) kaba la kawang ha ki 23.26 mitar bad ïa ka takma rnong la khur da ka Parimika Khongngain (West Jaiñtia Hills) kaba la kawang 21.84 mitar.
Ha ka Shot Put jong ka Under-14 (Girls) la khur jingjop da ka Leryang G. Marak (South Garo Hills) kaba la lah ban kawang ha ki 8.90 mitar, ia ka takma rupa la khur da ka Phibanrishisha Rashir (West Khasi Hills) kaba la lah ban kawang ha ki 8.85 mitar bad ïa ka takma rnong la khur da ka Veideihoi Khongsai (East Khasi Hills) kaba la kawang ha ki 8.83 mitar.
Ha ka Javelin Throw jong ka Under-16 (Boys) la khur jingjop da u Brayanly A. Sangma (South Garo Hills) da kaba u la lah ban kawang ha ki 45.11 mitar, ïa ka takma ksiar la khur da u Chijimra G. Momin (North Garo Hills) uba la kawang ha ki 43.40 mitar bad ïa ka takma rnong la khur da u Chingkam R. Marak (South Garo Hills) uba la kawang ha ki 43.37 mitar. Ha ka liang ki kynthei la jop da ka Wankynsai Pyrtuh (West Jaintia Hills) da kaba kawang ha ki 28.64 mitar, ïa ka takma rupa la khur da ka Tusame N.Marak (East Khasi Hills) kaba la kawang ha ki 28.39 mitar bad ïa ka takma rnong la khur da ka Wanrilin Nianglang (West Khasi Hills) kaba la kawang ha ki 24.11 mitar.
Ha ka High Jump jong ka Under- 18 (Boys) la jop da u Rihulstar Timung (Ri Bhoi) uba la lah ban kynthih ha ki 1.71 mitar, u Bawanlang Lyngdoh Mawnai (Eastern West Khasi Hills) u la khur ïa ka takma rupa da kaba kynthih ha ki 1.69 mitar bad ia ka takma rnong la khur da u Rikrim R Sangma (North Garo Hills) ha ki 1.63 mitar.
Ha ka Javelin Throw jong ka Under – 18 (Boys) la khur jingjop da u Siljring Marak (East Garo Hills) uba la lah ban kawang ha ki 43.08 mitar, ïa ka takma rupa la khur da u Salchagrik G. Momin (West Garo Hills) uba la lah ban kawang ha ki 41.18 mitar bad ïa ka takma rnong la khur da u Marius Phangcho (Ri Bhoi) uba la kawang ha ki 38.90 mitar.
Ïa kane ka lympung ïalehkai yn pynkut noh ha ka sngi Thohdieng ha kaba ka President ka Archery Association of Meghalaya bad kaba bat ruh kum ka Secretary jong ka tnat Revenue & Disaster jong ka Sorkar Jylla Kong Matsiewdor War Nongbri (IAS) kan long ka kongsan.
