Shillong, Jymmang 23
Ka SCA ‘A’ ka la long ka lahduh ha ka lympung ïalehkai kriket Women’s League ba la pynïaid da ka Shillong Cricket Association, hadien ba ka la lah ban pynliem noh ïa ka EWDCA da 43 run ha ka Sngi Palei.
Ha kane ka jingïakhun final kaba la long ha madan ïalehkai kriket jong ka MCA ha Polo, ka EWDCA kaba la jop ïa ka kynting pisa, ka la ailad shwa ïa ka SCA ‘A’ ba kan tied nyngkong ha kaba ka la kamai 122 run bad shah pynhap 3 wiket ha ki 20 over. Ka Rubi Chettri ka la tied 39 run na ki 52 bol bad ka Deima Lamare ka la ïoh 32 run na ki 33 bol. Katba ka Nerisa ka la shim shi wiket na ki 4 over.
Haba wan beh ïa ka thong, ka EWDCA ka la kamai tang 79 run bad shah pynhap 6 wiket ha ki 20 over. Ka Dubleen Nengnong ka la tied 28 run na ki 56 bol. Katba ka Neha Hajong ka la shim 2 wiket ha ki 3 over bad ka Monica Singh ka la shim 2 wiket ha ki 4 over. Ïa ka nam Player of the Final la khur da ka Rubi Chettri kaba la tied 39 run bad shim 1 wiket katba ïa ka nam Player of the Series la ïohpdiang da ka Neha Hajong jong ka SCA ‘A’.
Ïa ki khusnam sha kine ki kynhun la sam da u President ka Meghalaya Cricket Association u Naba Bhattachaterjee kum u kongsan ha ryngkat ka jingïadon lang u Secretary ka MCA u Bah Gideon Kharkongngor kum u symbud kongsan.
