Nongpoh, Jymmang 23
Ka lympung ïalehkai phut -bol ban pynsah kynmaw kyrpang ïa uwei na ki riew khraw ka Jylla, u Bah E.K Mawlong (bam kwai ha dwar u blei) ha ka Sngi Palei ka la poi noh sha kaba kut ha ka jingïakhun phainal ka la long kaba ishongkun bad shongshit ha madan ïalehkai jong ka Mawlasnai, Ri Bhoi District.
Ïa ka nam lahduh ha kane ka lympung la rah da ka Shillong Lajong FC hadien ba ka la lah ban pynliem noh ïa ka Benris SC da 2-0 kol.
Ïa kane ka lympung ïalehkai phutbol ba la pynlong da ka Mawlasnai Sports Club, la wan ban ïadon ryngkat da u Bah Ransom Sutnga kum u kongsan, u Bah Shem-phang Lyngdoh kum u symbud kongsan, u Dis-trict Sports Officer ka Ri Bhoi u Bah Bobby L. Nongbet, u nongïalehkai barim ka ri India, u Bah Aibor Khongjee katba na ka liang jong ka ïing ka sem u Bah E.K Mawlong la wan ban mihkhmat da u khun, u Bah Andrew W. Lyngdoh. Ha kane ka sngi la pynshongshit ruh ïa ki paidbah nongwan peit da ka jingshad jong ki khynnah skul ka thaiñ lem bad ka jingrwai na ka kynhun Chi Iung na Jowai.
Ka jingpynlong jong ka Mawlasnai Sports Club ïa kane ka lympung ïaleh-kai phutbol, lehse kaba heh tam ha kine ki thaiñ jong ka Raid Nongtung kadei ban pynsahnam bad kynmaw kyrpang ïa ka jingshakri, ka jinglehbha bad ka jingïajan ka jong ki paidbah bad u Bah E.K Mawlong uba ki ju khot ïeid ha kane ka thaiñ kum u Bah Heh.
Ka Mawlasnai Sports Club lyngba kawei ka heprit, ka la ïathuh ruh ïa ka khana lyngkot halor ka jingïaid lynti jong u Bah E.K Mawlong uba la kha ha ka 1 tarik jong u bnai Rymphang ha u snem 1946 ha ka shnong Maw-mih, East Khasi Hills kaba dang hap ha ka Bengal Presidency jong ka British India ha kito ki por.
Lyngba katei khana lyngkot, kitei ki nongïa-lam jong ka Mawlasnai Sports Club ki la pynpaw kum ka thaiñ Raid Nongtung hi baroh kawei kim lah ban klet ïa ka jing-leh bha ka jong u Bah E.K Mawlong halor ka jingïeid kaba kham kyrpang ka jong u ïa kane ka thaiñ bad ki paidbah ruh ki ïeid bad burom mar kylliang. Ka jingpynïoh ïa ka Mawlasnai PHC, ka Police Outpost, ka shlem treikam jong ka tnad Veterinary, ka surok PWD, ki surok ïaid kjat, ka jaka pynïeng kali ha Stand Jeep, Shillong bad shibun kiwei kiwei kiba utei u nongïalam ba radbah ka Jylla u la noh sha kane ka thaiñ, ka la pynlong ïa ki paidbah kane ka thaiñ jong ka Raid Nongtung ba kin ïai pyrto junom la junom wat la um don shuh ha ka sla pyrthei.
Haba phai pat sha ka jingïalehkai phainal ha kane ka sngi hapdeng ka Shillong Lajong FC pyrshah ïa ka Benris FC, ka long shisha kaba ishongkun bad shongshit naba baroh ar ki kynhun ki dei kiba la pyntbit bha ïalade bad kiba la ïalehkai bha ryngkat ka jingkynhoi bad risa jong ki spah ngut ki paidbah kiba la wan ban sakhi bad kyrshan ïa la ka kynhun kaba ki sngewmon.
Ha ka kylla step, ka Shillong Lajong ka la ïoh ban thep ar kol lyngba u Collin Salman Diengdoh ha ka minit kaba 4 bad kawei pat la pynbud da u Deibormane Tongper (42) na ka bynta bantam da 2-0 kol ha ka kylla step.
Ha ka kylla miet ka Benris FC ka la ïakhun tyngeh ban pynphai kylla, hynrei kam shym la lah ban haduh ka minit kaba kut.
Kumta ka Shillong Lajong ka la ïoh ban rah syndon ïa ka nam bad khur ruh ïa ka song pisa kaba T. 2 lak ryngkat ka trophy, katba ka Benris SC ka la ïoh T. 1 lak ryngkat ka trophy. Ïa ka nam Best Goalkeeper ba la ïoh da u R. Paul Lyngdoh, Top Scorer ka leit sha u Ribankhraw Kharumnuid bad ïa ka nam Man of the Match la ïoh da u Collin Salman Diengdoh. Kine baroh ki dei ki rangïalehkai ka Shillong Lajong.
