Jowai, Jymmang:
Ka shlem treikam District Horticulture Officer (DHO) West Jaiñtia Hills ha ka 23 tarik Jymmang ka la pynlong da ka rynsan pyni nam ïa ki mar rep mar riang kaba tip kum ka “Horti Fair cum Exhibition” kaba hap hapoh ka Mission for Integrated Development of Horticulture (MIDH) jong u snem 2023-2024.
Ïa kane ka rynsan pyni nam la pynlong ha Indoor Hall ka Dorbar shnong Ladthadlaboh ha ka jingdonlang u Deputy Commissioner ka West Jaiñtia Hills District Bah BS Sohliya, ka Kong DC Sohtun, Director Horticulture, u District Horticulture Officer ka West Jaiñtia Hills Bah S Rani bad ki nongrep ka district.
Ki nongrep na kylleng ki shnong jong ka District ki la wanrah ïa ki mar rep bapher bapher ba la bynta ha la ki jong ki jong ki kyrdan jong ki mar rep ba kynthup naduh ki jhur ki jhep, ki soh ki pai, ki syntiew ki skud, nalor ka umngap, ashar, ki jait umsoh bapher bapher bad kiwei kiwei de ki mar rep.
Ka Kong DC Sohtun, Director Horticulture ha ka jingkren ka la ong ka jingpynlong ïa ka jingpyni nam na ka por sha ka por ka long ban pynshlur bad ai mynsiem ïa ki nongrep ba kin leh bha ha ka kam rep kam riang ka jong ki bad ruh ban ïaphylliew jingmut markylliang khnang ban tip shuh shuh ïa ki lad ki lynti kumno ban pynbha shuh shuh ïa ka kam rep.
Haba ïadei bad ka skhim MIDH ka Kong Sohtun kala long ba dei ka skhim jong ka sorkar kmie kaba long 90 persen bad 10 persen na ka sorkar Jylla. Kane ka skhim ka mang ban pynkiew ïa ka jingthung ïa ki jhur bad ki soh, ban sumar ïa ki soh ki pai ynda la dep kheit, ban shna ïa ki soh bad ban pynïaid ïew ïa ki.
Nalorkata la mang ruh ban pynkiew ïa ka jingpynmih bad ki jingïoh jong ki nongrep, ban pynbha ïa ka jinglah ban pynmih da kaba ai ïa ki symbai kiba bha, ki tynrai jingthung kiba bha bad ban ai ka um kaba biang na ka bynta ki jingthung, ban thaw ïa ki lad ban ïoh kam na ka bynta ki samla nongkyndong ha ka liang ka kam rep jhur/soh bad kumno ban leh ïa ki mar rep ba la dep kheit.
Katba u DC pat u la ïaroh ïa ka jingtreikam ka tnat Horticulture kaba la pynlong ïa kane ka rynsan ban pynshlur ïa ki nongrep ka district bad u la ban khia ïa ka jingdonkam ki ophisar kiba peit ïa ka rep ka riang ban ïarap bad pynshai ïa ki nongrep ha kaba ïadei bad ka rep ka riang.
Ha kaba ïadei bad ka jingpyndonkam bakla ïa ka kyrteng jong u shynrai ne shyrmit Lakadong, u DC u la ong kum ka district kan shimkhia halor kane da kaba ïakynduh ïa ki ophisar ka tnat ha kine ki sngi ban wan ban kren pynbeit khnang ba ki nongrep kiba la trei shitom kin nym duh ïa ka hok.
Ïa ka jingïalang la pynkut da ka jingsam khusnam sha ki nongrep ha ka jingïalang kaba la pynïaid da ka Kong Risakaru Lyngdoh SMS (Agronomy) bad u Mebanphikir Kharbuli Farm Manager KVK.
