Shillong, Jymmang 24
Ka Khasi Hills Autonomous District Council (KHADC) ka la lah ban ai jingithuh biang sa ïa ki 24 ngut ki rangbah bad ki longkmie kiba ju donbynta ban sumar ïa kiba pang ba shitom bad kiba kheiñ ba kdiah da kaba pyndonkam da ki dawai kynbat Khasi. Kum ka dak ban ithuh ïa ka kam ba ki trei, la aiti ïa ka syrnot sha kine ki nongsumar lyngba ka Khasi Traditional Medicine Commission.
Ïa ka syrnot jingithuh la aiti sha kine ki nongsumar kynbat Khasi ha ka jingïalang kaba lyngkot kaba la long ha Conference Hall ka KHADC ha ka Sngi Thohdieng.
Ha kane ka jingïalang la donlang u Chief Executive Member (CEM), Bah Pynïaid Sing Syiem, u MDC ka Mawkynrew, Bah Martle N Mukhim, u Syiem ka Hima Mylliem, Pa’iem Ainam Manik Syiem, u Bah DL Nongspung uba dei u dkhot ka Khasi Traditional Medicine Commission (KTMC) bad kiwei kiwei nalor ki ophisar ka KHADC.
Ïa ka syrnot kaba la sam sha kine ki nongsumar kynbat Khasi ka dei kaba la ai lyngba ka Khasi Traditional Medicine Commission.
Haba ai jingkren, u CEM u la ïathuh ba ka Council ha ki por ba la dep, ka la ai jingithuh ïa 33 ngut ki nongsumar tynrai bad kin dang don shuh ki nongsumar dawai kynbat ki ban dang pynrung kyrteng ha kaba yn sa bishar bad khmih bniah ïa ka rukom treikam jong ki ha shwa ban rai ban ai jingithuh lyngba ka jingai syrnot ïa ki.
U Bah Pynïaid u la ong ba ka Council ka la ai jingithuh ïa ki nongsumar tynrai lyngba ka aiñ kaba la tip kum ka Khasi Hills Autonomous District (Protection and Promotion of Khasi Traditional Medicine) Act.
U la ong ba ki don ki kyndon kiba hap ban bud na ka bynta ka jingpynrung kyrteng bad ban pynshisha ïa ka por ba ki la sdang ban sumar bad ai dawai bad haba la ithuh da ka aiñ ki don shibun ki jingmyntoi namar ki ïoh ban trei laitluid ïa kam bad ki nongsumar ki lah ruh ban wah kyrteng ban pynbna paidbah ïa ka kam kaba ki trei kum ki nongsumar tynrai.
U Bah Pynïaid u la ong ba ka Council ka la tei khnang ïa ka Khasi Traditional Medicine Institute ha Lum Sohpetbneng bad ïa kane ka jaka ai jinghikai ïa ki nongsumar yn sa shimti da ka Centre of Learning, Knowledge and Services (COLKS) ban pynïaid bad ban peit.
Ïa kane ka jaka ai jinghikai la tei ha ka jingmang pisa kaba T. 5.77 klur.
U la ong ba ïa kane ka jaka ai jinghikai halor ka rukom sumar tynrai bad shna dawai ym sa plie noh ynda la kut ka ilekshon kata ha u Jylliew.
La ïoh ruh ka jingkren na u Bah Martle Mukhim nalor u Bah DL Nongspung uba la batai shaphang ka jingdon ki nongsumar kynbat Khasi kiba don la ka jong ka jong ka sap kaba U Blei u la ai bad ka bor ban pynduwai haba sumar ïa kiba pang ba shitom.
U Bah Nongspung u la kren ruh shaphang ka jingshna ïa ki dawai kynbat, ka rukom song ïa ki dawai bad ka rukom sumar ha la ka jong ka jong ka sap.
