Shillong, Jymmang 24
Ka AC Milan ha ka Sngi Thohdieng ka la pynbna ba u Stefano Pioli u la mih noh na kane ka klob hadien bym shym la lah ban pynurlong ban kynjoh sha ka thong ha kane ka aïom.
Kane ka kynhun kaba la bat ïa ka nam lahduh haduh 18 sien ha Italy, ka la hiar sha ka kyrdan ba-ar bad duna haduh 19 point ïa ka Inter Milan kaba la rah ïa ka nam lahduh. Kane ka kynhun kam shym ïoh ruh ban ïalehkai ha ka Champions League bad kumjuh ha ki lympung ïalehkai kiba la long hapoh katei ka ri.
“Ka AC Milan ka pynpaw ka jingai khublei ïa u Stefano Pioli lem bad ka kynhun ka jong u na ka bynta ban ïalam ïa kane ka kynhun ha kine ki san snem kaba ka lah ban rah teng ïa ka nam lahduh bad ban kyntiew ïa ka kane klob ban ïoh ïashim bynta ha ki lympung ïalehkai jong ka dewbah Europe,” la pynpaw kane ka klob.
“Ka jingtbit u Stefano ha ka ban pynïaid ïa kane ka klob ka la long ka jingnoh synñiang kaba khraw na ka bynta ka kynhun hi baroh kawei.”
U Pioli, uba la lah ban pynurlong ïa ka AC Milan ban khur ïa ka nam lahduh kaba nyngkong eh ha ka Serie A ha u 2022, u la pynïasoh sha kane ka klob ha u 2019.
Kane ka lahduh jong ka dewbah Europe kaba la bat haduh hynñiew sien, ka la kut noh ka jingïaid lynti tang ha ka jingïalehkai group jong ka Champions League bad kut ruh ha ka Coppa Italia tang ha ka quarter-final.
Te kumta ka Milan kan pynkhreh ïa ka jingïalehkai kaba khatduh mynta ka aïom pyrshah ïa ka Salernitana ha ka sngi Saitjaiñ.
