Shillong, Jymmang 24
Ka East Khasi Hills District ka la rah ïa ka nam ‘Over All Champion’ ha ka lympung ïalehkai State Level Inter-School Athletic Meet 2024 ba la pynïaid da ka tnat ïalehkai jong ka Sorkar Jylla ha ka Sngi Thohdieng.
Ka EKH ka la lah ban lah ban knieh noh ïa ka nam lahduh jong mynshem snem ka West Jaiñtia Hills hadien ba ka lah ban khur haduh 21 tylli ki takma kiba kynthup ïa 12 tylli ki takma ksiar, 6 tylli ki takma rupa bad 3 tylli ki takma rnong.
Ha kane ka sngi pynkut ïa kane ka lympung kaba la long ha ka Sngi Thohdieng, la don lang ka President ka Archery Association of Meghalaya bad kaba bat ruh kum ka Secretary jong ka tnat Revenue & Disaster jong ka Sorkar Jylla, Kong Matsiewdor War Nongbri (IAS) kum ka kongsan ha kaba la ïadon lang u Working President ka Meghalaya State Olympic Association u Bah John F. Kharshiing, kumjuh u Secretary Bah Finely Pariat, u nongïalehkai Olympic barim na Australia u Ian Campbell, Bah Khroobok Passah, Assistant Director, u Col Omkar Singh, Registrar ka skulbah NEHU, ka Sports Officer jong katei ka tnat Kong Darlyne Khonglam, ki DSO jong baroh ki district, ki nongpynïaid jong ka Athletic Federation of India (AFI) lem bad ki khynnah.
Ïa ka nam lahduh ha ka liang ki kynthei la rah da ka East Khasi Hills kaba la lah ban khur haduh 14 tylli ki takma kiba kynthup ïa 8 tylli ki takma ksiar, 4 tylli ki rupa bad 2 tylli ki takma rnong. Ka West Jaiñtia Hills ka la wan ba-ar da kaba khur 14 tylli ki takma kiba kynthup ïa 5 tylli ki takma ksiar, 4 tylli ki rupa bad 5 tylli ki takma rnong.
Ïa ka nam lahduh ha ka liang ki shynrang la rah da ka East Jaiñtia Hilla kaba la khur 15 tylli ki takma kiba kynthup ïa 7 tylli ki takma ksiar, kawei takma rupa lem bad 7 tylli takma rnong. Katba ka West Jaiñtia Hills ka la khur 14 tylli ki takma kiba kynthup ïa 4 tylli ki takma ksiar, 8 tylli ki takma rupa lem bad 2 tylli ki takma rnong.
Ïa ka kyrdan ba-ar la khur da ka East Jaiñtia Hills kaba la khur 22 tylli ki takma (10 tylli takma ksiar, 2 tylli takma rupa & 10 tylli takma rnong). Ka West Jaiñtia Hills ka la wan balai da kaba khur 28 tylli ki takma (9 tylli takma ksiar, 12 tylli takma rupa & 7 tylli takma rnong). Ka South Garo Hills ka la wan basaw da kaba khur 16 tylli ki takma (9 tylli takma ksiar, 4 tylli takma rupa & 3 tylli takma rnong). Ka Ri Bhoi District kaba la wan ha ka kyrdan ba-ar mynshem snem, ka la hiar shaduh ka kyrdan basan da kaba ïoh khur 22 tylli ki takma (4 tylli takma ksiar, 8 tylli takma rupa & 10 tylli takma rnong).
Ïa ka nam Best Athlete ha ka Under-14 la ïohpdiang da ka Amandy Rumnong na East Khasi Hills bad u Rikangku D. Sangma na South Garo Hills. Ha ka Under-16 la ïohpdiang da ka Sibilda Maring na Ri Bhoi bad u Saidul Ali na East Jaiñtia Hills. Katba ha ka Under-18 la ïohpdiang da ka Eliciana Lyngdoh na East Khasi Hills bad u Henry Yoga A. Sangma na East Khasi Hills.
