Jowai, Jymmang 26
Ka lympung ïalehkai jong ki skul ne ka Inter School ïa kaba la tip kum ka “Chess and Scrabble Tournament” ba la pynlong na ka bynta ki khynnah ba don ha sor Jowai ka la poi noh sha kaba kut bad la pynhap pyrda noh ïa ka ha ka 25 tarik mynta u bnai ha Government Girls Higher Secondary School ha Jowai.
Ïa kane ka lympung ïalehkai la pynïaid da ka ophis jong u Deputy Commissioner jong ka West Jaiñtia Hills kumjuh bad ka ophis jong u District Planning Officer, Jowai bad ryngkat ka jingïatreilang bad ka Jaiñtia Hills Chess Association bad ruh ka Meghalaya Chess Association.
Haba phai sha ka jingïakop ïalehkai Chess ha ka liang jong ki khynnah kynthei, ka Geliloth Nazarene S Kyndiah kala wan ha ka kyrdan kaba nyngkong, ïa ka kyrdan ba ar la ïoh da ka Nandani Sinha bad ba lai la ïoh da ka Ledawanki Talang bad baroh kine ki nongjop ki dei na ka Government Girls Higher Secondary School.
Haba phai pat ha ka liang jong ki shynrang, ïa ka nam kaba nyngkong la ïoh rah da u Zephaniah R Dkhar na ka Ches Stars Higher Secondary School, katba u Braxton Ryan Lamare bad u Damiki Nartiang na QC Springside Higher Secondary School kila wan ha ka kyrdan kaba ar bad ba lai.
Haba phai pat sha ka jingïakop Scrabble, ïa ka nam kaba nyngkong la ïoh da ka Riwinia Bamon na ka North Liberty Higher Secondary School, ba ar ka Susandaroi Rabon na ka Government Girls Higher Secondary School bad ïa ka kyrdan kaba lai la ïoh da u Jedidiah Passah na ka HK Singh Memorial Secondary.
