![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 26
Ka jingap jong ka PV Sindhu ban khur ïa ka nam lahduh ka la pulom noh hadien ba ka la shah pynliem ha ka final jong ka Malaysia Master ha ka Wang Zhi Yi kaba na China ha ka Sngi U Blei.
Ka Sindhu kaba bat ïa ka kyrdan kaba 15 ha ka pyrthei, kaba la jop ar tylli ki takma ha ka Olympic, ka sien ba khatduh ba ka la jop bad rah ki nam lahduh ka la long ha ka lympung Singapore Open bad Commonwealth Games ha u snem 2022 bad ka la shah rem noh ha ka final jong ka Madrid Spain Masters ha u 2023.
Ha kaba sdang ïa katei ka final, kane ka khlur ïalehkai Badminton ka Ri ka la lah ban ïalehkai bha bad jop ïa ka ‘game’ ba nyngkong bad la i kumba kan sa kynjoh biang sa sha kawei pat ka nam lahduh, hynrei ka Wang Zhi Yi kaba la ju bat teng kum ka World Champion, ka la ïakhun tyngeh ha ki ar tylli ki game bad ban jop syndon ïa ka jingïakhun da 21-16, 5-21 bad 16-21 ha ka jingïalehkai kaba la neh 79 minit.
Watla ka la shah rem noh ha ka final, hynrei ka jinglah ban ïalehkai bha bad ban poi shaduh ka final, kan ai mynsiem shi katdei eh ïa ka Sindhu khamtam ha ka ban pynkhreh pat ïa ka lympung Paris Olympics. Kane kan dei ruh ka final kaba nyngkong jong ka ha ka BWF World Tour kata hadien shisnem tam.
Ka Sindhu kaba la jop ka takma rupa bad rnong ha ki ar tylli ki lympung Olympics kiba la dep, ka la shah liem noh ha ka Wang ha ka Arctic Open ha u snem ba la lah hynrei ka la lah pat ban pynliem pat haduh ar sien ha ki lai tylli ki jingïakynduh pyrshah ïa kane ka ‘thei ïalehkai na China.
Lah ban pynkynmaw ba ha ka lympung Singapore Open ba ka Sindhu ka la rah ha u snem ba la lah, ka dei hadien ba ka la pynliem noh ïa ka Wang ha ka final jong kane ka lympung.
Hadien kane ka jingshah rem, mynta pat ka Sindhu kan pynkhreh ban ïakhun ha ka lympung Singapore Open Super 750 ka ban sdang naduh ka sngi Ba-ar.