![U Nongsaiñ Hima - Khubor Khasi](https://unongsainhima.com/wp-content/uploads/2023/02/splash-screen-720x405.webp)
Shillong, Jymmang 26
Ki dang don sa kumba 53 tylli ki ‘mobile tower’ jong ki kompani kiba dang pynsahteng ban siew ïa ka bai ilektrik sha ka Meghalaya Energy Corporation Limited (MeECL). Kine 53 tylli ki la hiar na ki 106 tylli ki ‘mobile tower’ kiba ki kompani ki khlem siew ïa ka bai ilektrik baroh shikatta.
La ïathuh ba ki don ki mobile tower jong ka kompani Reliance kiba ym pat lah ban leh ei ei ïa mynta namar kane ka kompani ka don ka mukotduma kaba dang sahteng ha Ïingbishar namar ka la leit mudui hadien ba ka MeECL ka la ot ïa ka bording ilektrik na ka daw ba khlem siew ïa ka bai ilektrik jong ki tower.
Kine ki kompani ki ju pynïeng ïa ki tower ha kylleng ki jaka na ka bynta ban biang ka kor ïakren lyngba ka mobile phone.
Hynrei namar ka jingpynsahteng ïa ka bai ilektrik, ka MeECL ka la ot ïa ka bording wat ïa ki tower jong kine ki kompani kiba ki ju siew ïa ka bai ilektrik.
Ha u snem ba la dep haduh ka 30 tarik Naiwieng, 2023, ki tower jong ki kompani kiba la shah-ot ka bording ilektrik bad ki tower kiba khlem pat shah ot ka bording ki long 265 tylli bad ka bai bording ilektrik baroh kaba pynsahteng ha u snem ba la dep lada kheiñlang baroh ka long T.490.18 lak.
Ka MeECL ka la pyni da ki kam pyrshah ïa kine ki kompani da kaba ot ïa ka bording ilektrik namar ka jingbym siew tista ïa ka bai ilektrik.