Shillong, Jymmang 26
U Bah Lakhon Kma uba dei u kyrtong shimet ha kane ka ilekshon MP sha Lok Sabha na Shillong constituency, u la pynpaw ba u la jan klet namar ka sngi ñiew ‘vote’ ka la slem palat haduh ka 4 tarik u Jylliew 2024.
Haba ka sngi ñiew ‘vote’ ka la jan poi artad naba ka por ka sah satang shi taïew tam eiei, u Bah Lakhon u la ong ba naduh ba u la dep thep ïa ka ‘vote’ hadien katto-katne sngi u la leit biang sha skul bah NEHU ban bteng ïa ka kam hikai namar ha kane ka ilekshon u shim shuti.
U Bah Lakhon u la ïathuh ba u dei u nonghikai ha ka subjek Chemistry ha NEHU bad u long ruh u director ha ka kam ïalehkai ha katei ka skul bah bad President ka NEHUSTA.
Haba kylli u sngew kumno haba ka sngi ñiew ‘vote’ ka la jan, u la ong, “Ngam sngew dik-dik shuh ka mynsiem namar nga la bunkam ban hikai man ka sngi ïa ki khynnah namar lada dei ka sngi ñiew ‘vote’ tang katto-katne sngi hadien ba la dep thep ‘vote’, nga lah tharai ban dik-dik ka mynsiem”.
U la ong ba ka kamram jong u kum u kyrtong u la dep pynshai sha ki paidbah ïa ka nongrim ba u ïeng bad ki paidbah ruh ki la dep rai ha ka 19 tarik u Ïaïong 2024 bad yn ap beit ïa ka jubab haduh ka 4 tarik u Jylliew 2024.
“Nga ïoh shibun ki jinghikai ki jingtip haba nga ïakhun hi ïa kane ka ilekshon MP Lok Sabha namar baroh shikatta nga dei tang u nongthep vote” u la ong.
Nalor kata, u la batai ba ka jingïoh jingmut ka dei namar u hap ban pyrkhat hi ïa kaei ka kam ba u leh namar u ïakhun kum u kyrtong shimet ym kum u kyrtong na ka seng saiñpyrthei kaba la don kiba ïarap na ki para nongkitkam.
U la pynpaw ruh ba mynta u la bunkam ban ai jingkheiñ jingdiah sha ka tnat Election Commission ïa ka jingpynlut ha ka jingleit ïalap ilekshon.
Ka jingñiew ïa ka ‘vote’ ha Meghalaya bad ha kylleng ka ri India ka sah satang shi taïew tam ka por shwa ban poi sha ka 4 tarik u Jylliew 2024.
Kum ban pynkynmaw ki kyrtong kiba ïakhun ha kane ka ilekshon MP sha Lok Sabha na Shillong Parliamentary Constituency ki don hynriew ngut, kita ki long ka Kong Ampareen Lyngdoh na ka NPP, u Bah Robertjune Kharjahrin na ka UDP, u Dr. Ricky AJ Syngkon na ka VPP, u Bah Vincent H Pala na ka Congress, u Bah Lakhon Kma bad u Bah Peter Challam kum ki kyrtong shimet.
