Shillong, Jymmang 26
Ka Manchester United ka la pynshaïong ngaiñ ïa ka Manchester City da kaba pynliem noh ha ka jingïa-lehkai final bad ban rah syndon ïa ka nam lahduh jong ka lympung FA Cup. Kane ka jingjop ka la pynlong ruh ïa ka United ban ïoh buh jaka ïa lade ha ka lympung Europa League.
Ha shwa jong ka jingïalehkai final, baroh baroh ki la shim beit ba ka Manchester City kan jop da kaba suk, khamtam lei haba phai sha ka rukom ïalehkai ka United ha kane ka aiom kaba la hiar bha, hynrei mar ïa sdang ka jingïalehkai, ki rangïaleh-kai ka United ki la ïakhun tyngeh bad ban tam lypa da 2-0 kol haduh ba kut ka kylla step.
Wat la ka City ka la ïoh ban thep ïa ka shi kol ha ki minit shwa ban wai ka jingïalehkai, hynrei kam shym la lah pat ban wad ïa ka kol ba-ar namar ka jingïalehkai bha ki rangïalehkai shadien ka United bad ha kaba kut, ka United ka la jop da 2-1 kol kaba la long ha Wembley.
Kane ka jingjop ka la pynlong ruh ïa ka United ban rah ïa ka nam lahduh jong ka FA Cup kaba 13 sien bad kaba nyngkong naduh u snem 2016, katba ka la khang lynti pat ïa ka City ban jop kynthih ar sien ïa ka nam lahduh kaba heh ha England, kata ka Premier League bad ka FA Cup.
Kumba ka long, ka Manchester United ha kane ka aiom, ka la ïaleh-kai sniew bha bad ruh ban hiar sha ka kyrdan kaba phra ha ka lympung Premier League bad duh syndon ka lad ban rung sha ki lympung baheh jong ka dewbah Europe.
Hynrei ka jingkyrmen ka long tang na ka lympung FA Cup, ha kaba la dep ban tip lypa ba lada jop yn ïoh ban rung sha ka Europa League hynrei ka nam rem, kan pynduh lad syndon.
Ka jingjop ka Man United, ka la pynduh lad noh ïa ka Newcastle United kaba la don jingkyrmen ban ïoh ïakhun ha ka UEFA Conference League hynrei mynta kan hap ban phai khmat biang tang sha ki lympung ha England, namar ïa ka jaka ha ka UEFA Conference League la shimti noh da ka Chelsea.
