Nongpoh, Jymmang 26
Ka jingpynher sted bad ñiah khyllew ïa ki ar-shaka kam dei shuh kaba dang thymmai, hynrei kaba la ju leh da ka kynhun ki nongñiah ar-shaka ha kylleng ki jaka ka Ri-lum Khasi Jaiñtia, khamtam ha ka surok Sohra, ka surok Umroi-Bypass bad ruh ha ka surok National Highway.
Bunsien, ïa kine ki kynhun jong ki nongñiah ar shaka la ju kham ïohi ha ki Sngi U Blei ba ki mih ban leh ïa kitei ki kam ban pynlong ïa ka surok kum ka jaka leh ‘stunt’ kaba bunsien, ka ju wanrah ïa ka jingjia ba sngewsih ym tang ïa kitei ki nongñiah hynrei wat ki nongleit nongwan ruh kiba pyndonkam ïa ka surok.
Mynta ka Sngi U Blei ruh, ki la don biang kumba palat khyndai ngut ki nongñiah ar-shaka na Shillong kiba la wan ban pynlong ïa ka surokbah National Highway-6 ha ki bynta kiba dang hap ha ka shnong Jyntru.
Kane ka jingleh jong kine ki ar-shaka, ka la buh jingma shi kat dei ïa kiwei pat ki kali kiba pyndonkam lang ïa katei ka surokbah kat haduh ba ki hap ban pyntip noh ïa kane ka jingleh kitei ki nongñiah ar-shaka sha ki bor pulit ka thanat Nongpoh.
Ki bor pulit na ka thanat Nongpoh ruh tang mar ïa ïoh jingtip ïa katei ka kam, ki leit mar-mar sha katei ka jaka bad ban rah noh ïa kitei ki nongñiah ar shaka sha thanat Nongpoh.
Na ka liang kitei ki nongñiah ki la panmap noh na ki bor pulit ka thanat Nongpoh da kaba ai ruh da ka jingthoh bad soi kyrteng ba kin ym mlien shuh ban leh biang ïa kitei ki kam ‘stunt’ ïa ki ar-shaka nangne shakhmat.
