Shillong, Jymmang 26
Ka Dipa Karmakar ka la ïoh ban thaw histori ha ka lympung Asian Women’s Artistic Gymnastic Cham -pionship kaba la long ha Tashkent ha ka Sngi U Blei ha kaba ka la khur ïa ka takma ksiar bad ban long ka nong India kaba nyngkong ban poi sha kane ka thong.
Haba phai sha ka final jong ka ‘individual vault’, ka Karmakar ka la lah ban pyndep ha ka kyrdan kaba hakhlieh duh napdeng phra ngut ki nongïakhun da kaba ïoh ïa ka average score kaba 13.566. Ha baroh ar tylli ki jingpyrshang, ka Karmakar kaba la dap 30 snem ka la ïoh katjuh ki point da 13.566.
Ka Kim Son Hyang kaba na North Korea ka la ïoh 13.466 bad ka Jo Kyong Byol ruh kaba na North Korea ka la ïoh 12.966 ban khur ïa ka khusnam takma rupa bad rnong.
Lah ban pynkynmaw ba ha u snem 2015, ka Karmakar ka la jop bad khur takma rnong ha kane kajuh ka lympung kaba la long ha Hiroshima.
Ka Karmakar ka la paw bha ruh ha ka Ri baroh kawei hadien ba ka la poi ha ka kyrdan kaba saw ha ka jingïakhun ‘vault final’ ha ka lympung Rio Olympics ha u snem 2016 bad ha u snem 2014 ka Karmakar ka la khur takma rnong ha ka Glasgow Commonwealth Games.
