Hyderabad, Jymmang:
Wat lada ka sorkar ka la pynshisha da kaba ong ba la dei ban buh hakhmat eh ïa ka jingnang jingstad, ki rukom pyntreikam ha ki skul kiba ha Telangana ki la ïakynduh jingeh shibun, kine ki kynthup ïa ki skul kiba hap hapoh ka jingkhmih jong ka sorkar jylla ha kaba ki la shem jingeh na ka jingduna jong ka jingleit pynrung kyrteng jong ki khynnah.
Kumba la ïohlum jingkheiñ la ong ba naduh ka minit jong ki jingïalang jong ka Project Approval Board (PAB) na ka bynta ban ïakren bad ïamir jingmut halor ki rukom pyntreikam na ka bynta ka Samagra Shiksha Scheme na ka bynta u snem 2024-25 ha Telangana, ki la don kumba 30,023 tylli ki skul ha ka jylla, na kine ki la don kumba 1,213 tylli ki skul ïa kiba la sakhi ba ym shym la don khynnah ki ban leit pynrung kyrteng katba ki la don hapoh 50 ngut ki khynnah kiba la leit pynrung kyrteng ha kumba 13,364 (da 48.55%) tylli ki skul ha ka jylla. Kumjuh, la don tang iwei iwei i nonghkai ha ki 5,821 tylli ki skul.
Haba la ïohi ïa kane, u Secretary of School Education and Literacy ha ka tnat ka pule-puthi sha ka Telangana u la ong ba ka jylla ka la donkam ban pyntikna ha ka ban ïoh ban pynrung kyrteng ïa ki khynnah ha ki skul bad ban pyntikna ruh ban pynbun ïa ka jingdon jong ki nonghikai ha baroh ki skul, khamtam ha ki klas kiba dei ban pynïoh ïa ka nongrim jong ki jingai jinghikai.
Ka PAB ka la mynjur ïa ka mang tyngka kaba `. 1,907.52 klur na ka bynta ban pyntreikam ïa ka Samagra Shiksha Scheme ha Telangana. Nalor kane ka pisa, ka sorkar kmie kan sa pynbiang shuh shuh sa kumba `. 1,148.34 klur na ka jingïasam lang. Ka jingïasam jong ka sorkar jylla kan sa long `. 765.56 klur. Ha kaba ïadei bad kane, ka PAB ka la ithuh ba ïa ka pisa ba la ïohpdiang da `. 439.94 klur ha ki snem ba la leit ym pat shym la pynlut da ka Telangana.
