Shillong, Jymmang 27
Ka jingdon u Pep Guardiola kum u khlieh duh ka Manchester City ka la pynlong ïa kane ka klob kum ka kynhun kaba paw ha ka lympung ïalehkai phutbol ha England. Une u manager u lah ban pynkut noh ïa ki khyndai tylli ki aïom na kane ka klob jong ka Premier League.
U Guardiola u la pynïasoh sha ka Manchester City ha u 2016 ha kaba u la lah ban pynurlong ïa kane ka klob ban rah nam lahduh haduh hynriew sien ha ka Premier League, saw sien ha ka Carabao Cups, ar sien ha ka FA cup bad kiwei ki lympung.
Kat kum ki khubor la ong ba u Guardiola u la pynkhreh ban mih noh na ka Man City ha kaba kut jong ka aïom ka ban wan wat la kane ka klob ka dang kwah ba un dang ïaisah. Kane ka khubor ka la paw hadien ba utei u coach uba na Spain u la lah ban pynurlong ïa ka City ban rah ïa ka nam lahduh kaba hynriew ha ka Premier League, hadien ba ka lah ban pynliem ïa ka West Ham ha ka jingïalehkai kaba khatduh jong kane ka aïom.
Hadien ka jinglah ban pynthikna ïa katei ka nam, na ka liang u Guardiola u la pynpaw shai ba ka jingïadei bad kane ka klob ka lah ban poi noh sha kaba kut da kaba ong ba ka jingmih noh ka la nangjan ban ïa kaba ïai sah ha kane ka klob.
Ka aïom ïalehkai 2022-23 lehse ka long ka jingïalehkai bha kane ka klob jong ka Premier League kaba ka long ka kynhun kaba ar na England hadien ka Manchester United ban rah ïa ka nam lahduh ha ka Premier League, FA Cup bad kumjuh ha ka Champions League.
Hadien ba ka City ka la shah rem ha ka Manchester United ha ka jingïakhun final jong ka FA Cup, u Guardiola u la pynpaw ïa ka jingthrang ban wanphai da ka jingjop na ka bynta katei ka klob kaba na Manchester. “Ka don ka jingthrang hapoh jong nga ban ïoh jingjop ha man la ki jingïakhun bad kiwei ki rangïalehkai ki kwah ban pynurlong ïa kane ka jingangnud. Te kumta lyngba kane ka aïom, ngi khmih lynti ban rah bun tylli ki nam jop ha ka aïom ka ban wan,” la bynrap une u coach uba na Spain hadien ka jingshah rem ha ka FA Cup ha ka Manchester United.
