Shillong, Jymmang 27
Ka Meghalaya State Olympic Association kan rakhe ïa ka Olympic Day 2024 da kaba kan pynlong ïa ka jingïakop mareh ba la tip kum ka 5th Olympic Day 10k Run ha ka 22 tarik u Jylliew mynta u snem ha kane ka nongbah.
Kane ka jingïakop mareh ka ban long ha ka por 6 baje mynstep, kan sdang na J.N Stadium sha 4th Furlong, Shillong College, Don Dosco, Police Point Beathouse, Fire Brigate sha St. Edmund, Malki, Civil Hospital ,Secretariat, DC Office sha Raj Bhavan, Nan Polok, Ïew Polo bad ban pynkut biang ha J.N Stadium.
Katei ka synjuk ka la pynkhreh ruh ïa ki khusnam pisa na ka bynta ki nongjop kynthei bad shynrang kiba naduh 16 snem shaneng, kumjuh ha ka Open Category bad kiba la 50 snem shaneng. Kine ki khusnam pisa ki long T.5000, T.3000 bad T.2000 ïa kiba wan ha ka kyrdan ba nyngkong, ba-ar bad balai. Kin don ruh ki khusnam kiba kyrpang ïa ki nongïashim bynta kiba dangkhynnah tam bad kiba la rangbah tam.
Ïa ki kyrteng bad ki rta jong ki nongïashim bynta lah ban pynpoi ha ka shlem treikam jong ka Msoa naduh ka por 2 baje haduh 6 baje lane da kaba phah ha u whatapp no 9233072206.
“Ngi la pynkhreh ruh ïa ki sopti (T-shirt) na ka bynta ki nongshim bynta bad tang kito kiba poi kloi ha katei ka step jong ka 22 tarik ki ban ïohpdiang ïa kitei ki sopti,” la pynpaw u Secretary ka MSOA u Bah Finely Pariat.
