Shillong, Jymmang 27
U manager barim ka Spain bad Real Madrid u Julen Lopetegui u la paw kyrteng kum u coach ba thymmai jong ka West Ham United, la pynbna kane ka klob jong ka Premier League ha ka sngi Palei.
U Lopetegui un shimti ïa kane ka klob kaba na London naduh ka 1 tarik u Naitung ha ka jaka u David Moyes uba la mih noh mynta u bnai. Kane ka klob ka la wan ha ka kyrdan ba khyndai ryngkat bad 52 point bad ka la duh da ka said ban ïoh rung sha ki lympung ïalehkai ha Europe na ka bynta ka aïom ka ban wan.
Ha ka kyrwoh na ka liang u Lopetegui uba la 57 snem ka rta, u la pynpaw ka jingsngewkmen ban shimti kum u coach, “Ka jingthrang ka jong nga kum u coach ka long ban nangkiew shaphrang, ban kynjoh sha ki kyrdan kiba kham shakhmat, kumjuh ban kyntiew ïa ki nongïalehkai bad kumjuh ïa ka kynhun hi baroh kawei.”
U la pynpaw ïa ka jingthrang ban kyntiew ïa ka klob da kaba ong, “Ka long na kaba nga long. Nga wan ha kane ka klob ka long ban kyntiew ïa ka namar ka jingthrang hi ka long ban ïaleh katba lah na ka bynta ban kyntiew ïa ka.”
Kumu rangïalehkai u Lopetegui u la ïoh ban ïalehkai na ka Barcelona bad Real Madrid, watla u la sdang ban ïalehkai nyngkong na ka Logrones bad ka Rayo Vallecano. Ha ka jingshimti jong u kum u coach ka long na ka bynta ka Spain hashwa ba un leit shimti ïa ka Rayo Vallecano ha ka lympung ïalehkai second division kaba ha Spain bad ka klob kaba na Portugal ka Porto.
Hynrei ka jinglah ban pynurlong kum u coach ka long ha ki lai snem ba u la don ha ka Sevilla, ha kaba u la lah ban pynurlong ïa kane ka kynhun ïalehkai jong ka LaLiga ban khur ïa ka jingjop ha ka Europa League 2020.
