Shillong, Jymmang 28
U Thibaut Courtois u la mih noh na ka kynhun ïalehkai ka Belgium na ka bynta ka Euro 2024, wat la une u rang apkol ka Real Madrid un pynkhreh na ka bynta ka jingïakhun final jong ka Champions League ka ban long ha ka miet jong ka Sngi Saitjaiñ.
U Courtois u la mih noh na kane ka kynhun jong ka Belgium ha u Jylliew mynshem snem hadien ba um shym la shah jied kum u kapten hadien ka jingshongthait noh u Eden Hazard bad kane ka la pynkyndit ïa kiba bun ki paidbah bad khamtam ïa u coach u Domenico Tedesco.
Une u rangïalehkai ba la 32 snem ka rta u la shah kynthoh ha ki para nongïalehkai bad hadien ki la pynpaw ka jingbabe halor ka jingmih noh ka jong u na ka kynhun.
U Coutois u la mad ïa ki jingeh ha ka aïom ïalehkai hadien ba u la ngat ha ki jingmynsaw ar sien ka khohsiew jong u. U la wanphai ban ïakhun pyrshah ïa ka Cadiz ha ka lympung LaLiga ha ka 4 tarik mynta u bnai, hynrei u la hap ban shong shabar na ka Madrid ha ka jingïakhun semi final jong ka Champions League (second leg) pyrshah ïa ka Bayern Munich. Une u rangïalehkai u la lah ban pyllait na ka jingshah thep ha ka jingiakhun pyrshah ïa ka Granada, Alaves bad ka Real Betis.
Ki khubor ki ïathuh ba u lada u long uba biang, kan ym don jingeh ïa u ba un ïoh ban mih madan ha ka final jong ka Champions League.
“U Courtois u long uba shai bad uba beit jingmut ha ka rukom ïalehkai. Ka jingïohpdiang jingtip ka jong ngi ka long ba um pat long la kloi ban ïalehkai na ka bynta ka European Championship. U tip bha ïalade,” la pynpaw u Tedesco ha ki lad pathai khubor ha ka Sngi Ba-ar.
Kumba ka paw u Thibaut Courtois u la ïalehkai khatduh eh na ka bynta ka Belgium ha ka 17 tarik u Jylliew jong u snem 2023.
Watla la shah ban pynmih haduh 26 ngut ki rangïalehkai na ka bynta katei ka lympung, hynrei na ka liang u Tedesco u la rai ban pynbna tang 25 ngut ki rangïalehkai ki ban leit sha Germany.
Hapoh kane ka kynhun la kynthup lang ïa u Axel Witsel uba la pynbna ban shongthait noh na ka kam ïalehkai bar ri. u la wanphai biang hadien ba u Tedesco u la leit sha ka Atletico Madrid ban pynbor ba u wanphai biang sha ka kynhun.
Une u rangïalehkai uba la 35 snem ka rta u la ïalehkai haduh 130 sien ha ka World Cup ha Qatar, ha kaba ka Belgium ka la shah rem noh ha ka jingïalehkai group.
“Nga la don ha ka jingmut jingpyrkhat jong nga la kham slem ban wanrah ïa u Axel,” la ong u Tedesco.
