New Delhi, Jymmang:
U Myntri ka sorkar kmie bad uba khmih ïa ka tnat ki kam pohïing u Amit Shah u la pynpaw ïa ka jingsngewskhem ba ka India kan sa ïohi ïa ka jingkut noh jong ki kam pyntriem jong ki lehnoh Naxal ha kine ki ar snem haduh lai snem ban sa wan.
Ha ka jingïakren bad ki nongthoh khubor, u Shah u la batai shai halor ki rukom pyntreikam ban lah ïaleh pyrshah ïa ki kam pyntriem jong ki Naxal ha kylleng ki jaka ha kaba u la ong ba kumba la khmih bniah la shem ba dei tang ka thaiñ kaba rit ha Chhattisgarh kaba dang shah ktah jur ha kine ki kam pyntriem jong ki lehnoh.
U Shah u la batai shai shuh shuh da kaba ong ba ka jingdon jong ki lehnoh ka la long ha ki bynta jong ka Pashupatinath haduh Tirupati.
U la ong ba ki jylla kiba la shah ktah jur bha ha ki kam pyntriem jong ki Naxal ki kynthup ïa ka Jharkhand, Bihar, Odisha, Telangana, bad Andhra Pradesh. Kine mynta kumba la sakhi, ki la lait na ki jingshah ktah ha ki kam pyntriem jong ki lehnoh.
Kumjuh, ka Maharashtra bad Madhya Pradesh ki la shah ñiew ba ki la long ki jylla kiba la lait na ki kam pyntriem jong ki Naxal.
“Khlem da buh por, ka ri ka la shimkhia ha kaba ïadei bad ki rukom pyntreikam ban ïakhun pyrshah ïa ki lehnoh kiba la don naduh Pashupatinath shaduh Tirupati. Ha kaba ïadei bad kane, ngi la lah ban pynduh pyndam ïa ki Naxal na baroh ki bynta jong ka ri. Ka Jharkhand, Bihar, Odisha, Telangana, bad Andhra Pradesh ki la lait na ki kam pyntriem jong ki lehnoh Naxal bad kumjuh ka Maharashtra bad ka Madhya Pradesh,” la ong u Shah.
