Paris, Jymmang:
Ki bor pyniaid jong ka nongbah Lyon ha ka Lah Sngi U Blei ki la pyntip ba ki la ioh kem noh ia u suba don kti ha ka jingjia dung tari ha kaba 3 ngut ki la mynsaw kaba la jia ha ka jaka sangeh rel jong ka thaiñ Mihngi ka France ha ka nongbah Lyon.
Ha kawei pat ka khubor, la ong ba u heh ka Lyon haba iakren bad ki lad pathai khubor pat u la ong ba ki don 4 ngut kiba la ngat bad mynsaw na katei ka jingjia ha katei ka sngi hynrei ki pulit kim pat pynpaw kyrteng ia kitei kiba mynsaw lane ia utei suba don kti ha katei ka jingjia ruh kumjuh.
Na ka liang ki pulit pat, ki la iathuh ba 2 ngut na kitei kiba shah dung tari ki dei kiba la shah dung na ki bynta jong ka kpoh bad uwei pat na ki bynta ka kti.
Ka kynhun tohkit jong ki pulit ka dang wad bniah ban lap ia ka daw jong katei ka jingleit thombor utei u briew ha katei ka jingjia namar ia mynta hi ym shym la ioh jingtip ba kan don kano- kano ka jingiakynad hapdeng kitei kiba mynsaw bad utei uba leh ia katei ka kam thombor.
Kumta, ia kitei ki 3 ngut la pynthiah noh baroh ha kawei na ki hospital kaba don hajan bad hapoh jong katei hi ka nongbah Lyon.
Katei ka jingjia ka la jia ha ka por kumba 2:40 jong ka nohphai sngi ha ka Sngi U Blei bad ki pulit ki la rah noh ia utei u suba don kti naka bynta ki jingtohkit bniah haba iadei bad katei ka jingjia.
