Lucknow, Jymmang:
Ka la long ka jingïakynduh jingeh kaba khraw na ka bynta ka seng Samajwadi Party, naba u nongïalam jong ka bad u Myntri barim u Narad Rai u la thmu ban leit pynïasoh bad ka seng BJP bad u la pynpaw ka jingïaroh ïa u Myntri Rangbahduh u Narendra Modi bad u Myntri ka sorkar kmie uba dei khmih ïa ka tnat ki kam pohïing u Amit Shah.
U la shondur lang ruh ha ka sngi ba u la leit ban ïakynduh ïa u Shah, ha kaba la lah ban ïohi ïa u nongïalam jong ka seng SBSP u Om Prakash Rajbhar ba ki la ïadon ryngkat. U Rai, kumba la ïathuh u nongaiktien jong ka seng SBSP u Arun Rajbhar, u la leit ban ïakynduh ïa u Shah ha Varanasi ha ka Lah Sngi U Blei.
“Ngan sa nang pynkhlaiñ shuh shuh ha kaba ïadei bad ki bor pyrkhat bad ka jingskhem jingmut ha ka ri na ka bynta ban pynkupbor ïa rukom im ki duk ki suk kiba dei na ka kynhun kaba rit eh hadien ka rai jong u Myntri Rangbahduh uba donburom u Narendra Modi, uba la pynpawnam ïa ka ri ha ka pyrthei, bad u Myntri ka sorkar kmie uba dei khmih ïa ka tnat ki kam pohïing bad u ‘riew radbah ha ka kam saiñ pyrthei, u Amit Shah,” la ong u Rai ha ka jingphah khubor lyngba ka rynsan X.
Ha ka jingïalang ba la pynlong ha ka shnong Khori Pakad ha ka Lah Sngi U Blei, u Rai u la pynshisha da kaba ong ba u la shah pynjah burom ha ka por ba don ka jingïalang paidbah ban ai jingkyrshan ïa u kyrtong jong ka seng SP u Sanatan Pandey naba ha ka por ba ai khublei ïa ka kyrteng jong u ym shym la pynpaw da u President jong ka seng u Akhilesh Yadav wat lada u la don lang ha ka rynsan.
