Shillong, Jymmang 28
Ka jingïaid lynti u Rafael Nadal ha ka French Open ka la poi sha kaba kut ha kaba une u rangïalehkai uba la bat ïa ka nam lahduh haduh 14 sien u la shah rem noh ha u Alexander Zverev. Kumta une rangïalehkai u pynleit jingmut mynta na ka bynta ka Paris Olympics ka ban long ha Naitung bad un ym ïashim bynta ha ka Wimbledon.
U Nadal, u ban sa kynjoh sha ka 38 snem ka rta ha ka 3 tarik u Jylliew, u la shah rem da 6-3, 7-6 (7/5), 6-3 ha ka wat kaba nyngkong ha u rangïalehkai uba la bat ïa ka kyrdan ba saw ha ka pyrthei u Zverev. Kane long ka jingshah rem kaba saw ha ki 116 sien ïakhun ha Roland Garros naduh ba u la rah ïa ka nam lahduh ha ka sien kaba nyngkong eh ha u 2005.
Kane ka long ka sien kaba nyngkong ba un shah rem ha Paris ha ka wat kaba nyngkong bad kane ka jingshah rem ka la buh jingkylli halor ka lawei ka jong u ha ka kam ïalehkai.
“Ngam tip shuh la kan dei ka sien kaba khatduh eh ïa nga ba ngan ïoh ïalehkai ha kane ka lympung hakhmat ki paidbah nongkyrshan,” la pynpaw u Nadal.
“Ka long kaba eh ïa nga ba ngan pynpaw halor ka jingïalehkai ka jong nga. Ka long ka jaka ïalehkai kaba nga da sngewtynnad eh.”
“Ka long kaba eh ïa nga ban pynpaw shaphang ka lawei. Nga la ïoh ban leh-kmen lang bad ki bahaïing hasem. Ka lah ban long ba ka la biang ïa nga ha ki ar bnai ki ban wan.”
U Nadal u lah ban ym wanphai shuh ha ka French Open jong u snem 2025 hynrei u dang pynleit jingmut ban ïalehkai ha ka Olympics ka ban long ha Roland Garros ha u Naitung mynta u snem.
Lah ban pynpaw u Nadal u la lah ban khur kawei takma ksiar ha ka Beijing Olympic ha u snem 2008 bad rah nam lahduh ha ka jingïalehkai doubles ha ka Rio Games.
“Nga donkam ban pynkhreh bha ïalade ba ngan pyni ïa ka jingtbit bad ban pynpaw ïa ka jingkhlaiñ,” la pynpaw une u rangïalehkai.
Na ka daw ka jingmynsaw une u rangïalehkai um shym la ioh ban ïashim bynta ha kino kino ki lympung naduh u Kyllalyngkot, te kumta Nadal uba la bat teng ïa ka kyrdan ba nyngkong ha ka pyrthei, mynta u la don ha ka kyrdan ba 275.
“Ka met ka jong nga kam shym la ailad ïa nga ha kine ki ar snem. Hynrei nga la pyrshang ban kilanmet na ka bynta ban wanphai da ka jingkhlaiñ bor,” la bynrap u Nadal uba dangshen u la don jingshitom ha ka bynta jong ka syngkai.
Ha ka kam ïalehkai, u la sangeh ïashim bynta ha ki 11 tylli ki Grand Slam. Te kumta kan long 12 bnai ha kaba un sangeh ïashim bynta ha ka Wimbledon, kaba long ka lympung kaba u la khur jingjop ha u 2008 bad 2010.
