New Delhi, Jymmang:
Ka Municipal Corporation of Delhi (MCD) ka la sdang ïa ki jingpynkhreh ha kaba ïadei bad ka jingthmu ban ïada na ka jingdait jong ki ‘kaiñ pyrjong ha kylleng ki jaka ha kaba ki la nang pynjur ïa ka jingleit khmih bniah ïa ki ïing, ka jingleit kynshait dawai, ka jingleit khmih bniah ïa ki jaka ba kham jur kiba shah ktah ha ka jingpang khie shoh, la ong ki heh ba dei khmih.
Ka tnat Municipal, ha kaba ïadei bad kane, ka la kyntait ban ai ïa ka jingtip kaba bniah ha kaba ïadei bad ka jingdon jong kiba ïoh ïa ka jingpang ba ïabit ha ka nongbah. Ka MCD ka la sangeh ban pyni paidbah ïa ki jingpyntip ba ju pyllait shisien shi taïew ha kaba ïadei bad ka jingdon jong kiba sha ktah ha ka jingpang ha ka 7 tarik, Nailar jong u snem ba la lah namar ka jingdon jong ka G20 Summit.
Ki heh jong ka MCD ki la ong ba ki la don shibun ki lad ki lynti na ka bynta ban ïakhun pyrshah ïa ki ‘kaiñ pyrjong kiba ju pynkharoi ïa ki jingpang kiba ïabit na uwei u briew sha uwei pat khamtam kum ha kane ka aïom bajur ka jinghap slap. Ka jingjur jong ka jinghap slap kumba la sakhi ha Delhi ka ju sdang ha bakut u bnai Jylliew ne ka taïew kaba nyngkong jong u bnai Naitung.
Kumba la buh jingkheiñ la ong ba ka MCD ka la pynlong ïa palat 1.29 klur sien ka jingleit jngoh sha man ki thliew ïing ha une u snem ha kaba la pynshitom tyngeh pyrshah ïa 24,480 tylli ki longïing ha kaba kim lah ban pynduh ïa ki jaka lang um kiba long ka daw jong ka jingkha pylleng kine ki ‘kaiñ pyrjong bad ka jingdon jong ka um jaboh.
Kane ka Corporation ka la leit kynshait dawai pynïap khñiang sha kumba 1,84,035 tylli ki ïing na ka bynta ban ïada na ki ‘kaiñ pyrjong. Ka MCD ka la ong shuh shuh ba ka la thmu ban bteng ha ka jingpyntreikam ban leit khmih sha kiba bun ki jaka kum ha ki jaka ba don ki jngshna thymmai ïa ki ïing bad kiwei pat, sha ki jaka treikam jong ki pulit, ki Park, ki jaka ai jingsumar, ki skul bad kiwei pat ki jaka pule bad sha ki jaka treikam sorkar, napdeng kiba bun kiwei pat ki jaka.
Ka MCD ka la ïoh ba lum ïa ka jingdaiñ kuna kaba la kot sha ka `. 5,18,605 na ki nongpynkheiñ aiñ ha kaba ka la pynshitom da kaba tyngeh pyrshah ïa ki 1,899 ngut ki nongleh pyrshah hapoh ka jingtreikam jong ka Malaria Bye-Laws of the DMC Act.
Haduh mynta ki la don baroh kumba 25,055 ki shithi ba la phah bad 5,766 tylli ki Challan ba la dep ban ai da ka Corporation sha kiba pynkheiñ aiñ.
