Chandigarh, Jymmang:
U heh nongïalam jong ka Dera Sacha Sauda u Gurmeet Ram Rahim hynnin ka sngi u la shah pyllait noh ha ka Punjab bad Haryana High Court ha kaba ïadei bad ka mukotduma jong ka jingshah pynïap u nongïalam barim jong ka Dera. U Ranjit Singh, uba ong u dkhot jong ka State-level Committee jong ka seng Dera u la shah siat ïap ha u snem 2002.
Kumba la pynshisha la ong ba kane ka kam pynïap briew ka don jingïadei bad ka jingjia ba la shah suba ba ka la don ka jingsam ïa ka shithi bym don kyrteng kaba la batai shai ha kano ka rukom ba u Ram Rahim u la pyndonkam bakla ïa ki kynthei ha ka jaka treikam ka seng Dera ha Sirsa kaba don ha Haryana.
Ha u snem 2021, ka ïingbishar jong ka kynhun CBI ka la rai pynrem ïa u Ram Rahim bad ïa saw ngut kiwei pat ha kaba ïadei bad ka jingjia jong ka jingpynïap briew bad rai pynrem ruh ïa ki ban kin shah set patok shirta jingim. Ka ïingbishar bakyrpad ka la ong ba ka jingtohkit jong ka ka la don hapdeng ka jingartatien ban pynshisha ba u heh nongïalam jong ka Dera u la bitar halor ka jingsaphriang jong ka shithi bad ïasuhbuit bad kiwei pat kiba la shah kynnoh ba kin pynïap ïa u Ranjit Singh.
U heh nongïalam jong ka Dera u la phah da ka jingmudui ban pyrshah halor ka jingshah rai pynrem jong u ha High Court. Ki saw ngut kiwei pat kiba la shah rai pynrem ha ka ïingbishar jong ka seng CBI ruh ki la shah pyllait noh ha kane kajuh ka sngi.
