Shillong, Jymmang 28
U Cristiano Ronaldo u la lah ban thaw rekod na ka jinglah ban thep kol bun ha ka lympung ïalehkai Saudi Pro League mynta ka aïom.
Une u khlur ïalehkai ka Porutgal u la ïoh ban thep ar kol na ka bynta ka Riyadh as Al-Nassr, kaba la lah ban pynliem noh ïa ka Al-Ittihad da 4-2 kol bad u la lah ruh ban kynjoh sha 35 kol da kaba tam shi kol ïa ka rekod ba la bat ha u 2019 da u Abderrazak Hamdallah.
Ha shwa ban kut ka kylla step jong kane jingïalehkai, u Ronaldo u la ïoh ban pynkhih jar hadien ka jingïarap pynbuh bol da u Mohammed Al-Fatil ha ka minit kaba 45+3.
Hadien 21 minit ba la bteng biang ïa ka jingïakhun jong ka kylla miet utei u khlur ïalehkai uba la khur ïa ka khusnam Ballon d’Or haduh san sien, u la ïoh ban lehkmen da kaba thep biang sa shi kol da ka khlieh na ka corner ba shut da u Marcelo Brozovic. Hadien san minit u la shah pynshong noh bad na ka liang ki paidbah nongkyrshan ki la ai khublei ïa u.
Kham ha shwa u Ronaldo u la khur ïa ka hat-trick da kaba thep lai kol bad u la ïohpdiang ruh kawei ka red card. U la shah sospon ruh na ka bynta kawei ka jingïalehkai ha u Rymphang.
Lyngba kane ka jingjop ka Al-Nassr ka la wan ha ka kyrdan ba-ar bad ka duna haduh 14 point ïa ka Al-Hilal, kaba la khur ïa ka jingjop ha ka championship mynshem artaïew bad ka la long ka kynhun kaba khlem shah rem haduh ka Lah Sngi U Blei.
Kumba ka paw ka Al-Hilal ka la long ka kynhun kaba khlaiñ bor wat la khlem u Neymar uba la pynïasoh sha kane ka klob ha u Nailar hadien ba u la mih noh na ka Paris Saint-Germain hynrei u la ngat ka jingmynsaw ka kjat ha u Risaw mynshem snem.
U Ronaldo uba la 39 snem ka rta u dang don jingkyrmen ban khur ïa ka trophy nam lahduh ha kaba ka Al-Nassr kan ïakynduh pyrshah ïa ka Al-Hilal ha ka final jong ka King’s Cup ka ban long ha ka Sngi Thohdieng.
