Shillong, Jymmang 28
Haduh 23 ngut ki ‘thei ïalehkai ki la shah jied ban mihkhmat ïa ka kynhun ïalehkai ka ri (senior) na ka bynta ki ar tylli ki jingïalehkai paralok bar ri pyrshah ïa ka Uzbekistan, la pynbna da ka All India Football Federation ha ka Lah Sngi U Blei.
Kane ka kynhun ïalehkai ka ri ka la pynkhreh ïa ka prokram kilanmet ha Hyderabad, na ka bynta ban pynkhreh ïa kitei ki jingïalehkai paralok ki ban long ha Tashkent, kiba thmu ban pynlong ha ka 31 tarik mynta u bnai bad 4 tarik u Jylliew.
Ha kaba sdang la pynbna ïa ka thup kyrteng kaba don 30 ngut, ha kaba kane ka kynhun ka la kilanmet ha ka madan ïalehkai jong ka Sreenidi Deccan FC na ka bynta artaïew ha shwa ba ka coach ka Langam Chaoba Devi kan pynduna ïa kane ka kynhun sha 23 ngut, ka ban leit sha ka nongbah Uzbek ha ka Sngi Balang.
