Bengaluru, Jymmang:
U MLA jong ka Bharatiya Janata Party u SN Channabasappa u la pynshisha halor ka jingdon jong ka kam bamsap kaba jur hapoh ka jingsynshar jong ka sorkar Congress bad ka Karnataka Maharshi Valmiki Scheduled Tribes Development Corporation Ltd (KMVSTDCL), ka jingpynïap hi jong u Superintendent Chandrashekharan ka la pynshisha halor kane.
“Ha ka shithi kaba u la dep ban thoh hashwa ka jingpynïap hi jong u, u Chandrashekharan u la pynpaw da kaba ong ba u la ïoh ïa ka hukum na u Myntri uba dei khmih ban phah noh ïa ka pisa jong ka Corporation bad ong ba kumba T. 87 klur ka dei ka pisa kaba shu tuh. Ki kyrteng jong ki lai ngut ki ophisar kiba kynthup ïa ka jong u JG Padmanabha, Parashuram bad Shuchismitha ki dei kiba la paw ha katei ka shithi kaba u la thoh,” u la ong.
Kum shi bynta ban buh ka jingkyrpad ïa ka sorkar na ka bynta ban pynlong da ka jingtohkit kaba bniah ha kaba ïadei bad ka jingjia, u la dawa ba la dei ban pyntreikam kyrkieh na ka bynta ban pynshitom tyngeh ïa ki runar kiba la donkti ha ka jingjia bad u la ong ruh ba un sa phah jingthoh sha u Lat jong ka jylla shaphang kane ka mat. Lada ka sorkar jylla kam lah ban leh ei ei ïa kaba donkam, ka seng kan sa pynlong da ka jingïakhih, u la maham.
U la pynshisha da kaba ong ba ka la shem shitom na ka bynta ki nongtrei sorkar kiba la leh ïa ki kam beaiñ ba kin shah beh kam hapoh ka jingsynshar jong kane ka sorkar kaba mynta.
