Katba ki nongshong shnong ka Meghalaya ki dang ïa ap sah lano ka Sorkar Pdeng kan ai jingmynjur ban pynjari da ki kyndon jong ka Inner-Line Permit (ILP) kum shi bynta ban teh lakam ïa ka jingwan rung ki briew kiba nabar, kiwei pat ki jylla bad Union Territory kum ka Delhi, West Bengal, Haryana bad Uttarakhand ki la ïaid shakhmat ban ai syrnod sha ki poiwir kiba wan na Pakistan, Bangladesh bad Afghanistan ban long kum ki nongshong shnong bapura jong ka Ri India. Ki poiwir kiba lah ban pan syrnod ban long nongshong shnong ka Ri India ki dei kito kiba la rung sha kane ka Ri hashwa ka 31 tarik Nohprah, 2014 na Pakistan, Bangladesh bad Afghanistan, bad ki dei ban long ki Hindu lane Sikh lane Jain lane Buddhist lane Parsi lane Khristan. Ka jingwan phet sha India jong kine ki poiwir na kitei ki lai tylli ki Ri ka dei halor ka nongrim ba ki la shah ban beiñ na ka daw ka jingngeit ka jong ki.
Ha ka 29 tarik Jymmang, 2024, ka Sorkar India lyngba ka tnat Korbar Ri ka la pyntip ba ka jingai syrnod sha ki poiwir hapoh ki kyndon jong ka Citizenship (Amendment) Rules, 2024 ka la sdang sa ha jylla West Bengal bad mynta ka sngi, katto katne ngut ki la ïoh jingmynjur na ka Empowered Committee, West Bengal ban long ki nongshong shnong bapura jong ka Ri India. La ong ba ki Empowered Committee jong ka Haryana bad Uttarakhand ruh ki la ai syrnod nongshong shnong sha ki katto katne kiba la pynbiang ïa ki kot ki sla katkum ki jingdonkam ba la kdew ha ka Citizenship (Amendment) Rules, 2024. Lah ban kdew ba ka sien banyngkong ba la ai syrnod nongshong shnong sha ki poiwir katkum ki kyndon jong ka Citizenship (Amendment) Rules, 2024, ka dei ha ka 15 tarik Jymmang, 2024. Ïa kine ki syrnod la ai jingmynjur da ka Empowered Committee, Delhi, bad la sam da u Secretary ka tnat Korbar Ri ha ka jingïalang kaba la long ha Delhi.
Ka Sorkar India ka la pynbna ïa ki kyndon Citizenship (Amendment) Rules, 2024 ha ka 11 tarik Lber, 2024. Katkum kine ki kyndon, la batai kumno ki poiwir ki lah ban pan phah ïa ki kot ki sla ban pan ban long nongshong shnong jong ka Ri India. Ha kajuh ka por, la batai ruh ïa ki kyndon ba ki District Level Committee (DLC) kin hap ban bud haba ki peit bniah ïa ki kot ki sla ba la ai da ki poiwir. Nalorkata, la kdew kiei ki kamram jong ka Empowered Committee ha ki jylla kiba dei ban rai ïano ban ai ïa ki syrnod nongshong shnong. Ïa ki kot ki sla baroh hap ban ai lyngba ka rynsan ‘Online’ jong ka Sorkar India.
Mynta, haba ki poiwir ki la kylla ki nongshong shnong bapura, kam da don jingmut shuh ban buh da ki jingpyrkhing namar ka Riti Synshar ka pynkup bor ha ki nongshong shnong ba kin leit kin wan kat shaba ki mon hapoh u pud u sam jong ka Ri India. Hynrei lada don ka ILP, kin hap ban pan da ka ‘Permit’ hashwa ba kin leit rung sha kito ki jylla kum ka Arunachal Pradesh, Manipur, Mizoram bad Nagaland. Ngim tip lano kata ka ILP kan wan urlong ha kane ka jylla Meghalaya watla ka jingdawa ka la wan naduh ka Ïingdorbar Thawaiñ kaba dei ka shap ka muhor jong ki nongshong shnong. Ka Sorkar Pdeng ba la ïalam da u Narendra Modi kum u Myntri Rangbahduh ka la don la 10 snem ha ka bor synshar ha Delhi bad ka tip bha shaphang ka jingdawa ban pynjari da ka ILP ha Meghalaya. Ha kine ki 10 snem, la bun ki jingthoh bad ki jingleit ïakynduh markhmat bad ki bor synshar ka Sorkar Pdeng ban pynsngew halor ka jingdawa ILP.
Hynrei ngim ïohi satia ba kita kin urlong. Ha kawei pat ka liang, ngi ïohi ba wat hapdeng ki jingpyrshah bad jingïakhih, ka Sorkar Pdeng ka la ïaid beit shakhmat ban pynkylla ïa ka Citizenship Act ha u snem 2019, bad mynta ki poiwir na Pakistan, Bangladesh bad Afghanistan ki la ïoh ban long nongshong shnong namar ka jingshah ban beiñ ha kine ki Ri na ka daw jong ka jingngeit ka jong ki. Ha ki ilekshon nangne shakhmat, kine ki poiwir kin lah ban ïashim bynta bad ban jied ïa ki MLA ne ki MP ha ki jaka ba ki don. Yn ym don ba lah ban knieh ïa kane ka hok na ki namar ki la long ki nongshong shnong bapura. Hadien katto katne snem, lada ki kwah ban long nongshong wai ha ki ïing ki sem kiba don ha Shillong, ym lah satia ban khang namar ki dei ki nongshong shnong bapura ka Ri India. Mynshwa ki dei ki poiwir, mynta ki la kylla ki nongshong shnong bapura bad ki don ïa kijuh ki hok kumba long lem kiwei ki para nongshong shnong. Watla katta ruh, ngin dang ïai ap ïa kata ka ILP na Delhi.
