Seoul, Jymmmang:
U nongialam jong ka North Korea, u Kim Jong Un ha kane ka kynti u la pynpaw ia ka jingbym salia jong ka North Korea ia ki jingmaham bad jing- byrngem jong kiwei pat ki ri kiba kwah ban pynsangeh ia ki jingthmu jong kane ka ri ban leitbuh kor satellite sha haw-haw ha kine ki por ban wan.
Namar utei u nongialam u la ong ba ka North Korea ka leh ia kane ruh na ka bynta ka jingshngaiñ jong ka ri jong u bad yn lah ban ioh ia ki jingtip katkum ki jingdonkam jong ka bad kan pynsuk ruh ia ka ban tehlakam ia ki jingeh kiba lah ban wan jia lada la ioh ban peit-thuh lypa ia ka jinglong- jingman ha kylleng sawdong jong ka ri lyngba jong kitei ki kor satellite kiba kan pyntreikam.
Wat la katta, la ong ba ka jingpyrshang leit buh satellite jong ka North Korea ha ka Sngi Nyngkong ka la pulom noh hadien ba u roket uba la pynkit ia utei u kor satellite u la bthei noh tang shiteng suiñ katba dang thmu ban pynpoi sha haw-haw.
Namar kata, haba ai jingkren ha ka Academy of Defence Sciences ha katei ka sngi, u Kim u la ong ba ka North Korea ka donkam ban pynkhlaiñ ialade bad ka donkam ruh ban wanrah ia ki lad jingiada katkum ka jingstad bad ka jingiaid jong kane ka juk namar ka long kaba donkam ban ioh peit thuh ia ka jinglong jingman jong ka ri khnang ban lah tehlakam bad ban iada ia ka ri na ki jingma bad ki jingeh kiba lah ban wan ha ki por ki bym lah ban tip.
