Shillong, Jymmang 29
Ka Shillong Sports Association (SSA) kan pynlong ïa ka ilekshon na ka bynta ban jied ïa ki nongkitkam thymmai na ka bynta ka samoi treikam kaba thymmai ha ka Sngi Saitjaiñ ha Conference Hall jong kane ka synjuk.
Ha kane ka kynti kaba mynta ka SSA ka la pynkhreh ban wanrah da ki ‘riew saiñ pyrthei khnang ban ïoh ïa ki jingmyntoi na ka Sorkar Jylla lyngba ki skhim bapher bapher kiba ïadei bad ki jingmaramot ïa ki bynta kiba dangsah jong ka SSA Stadium kaba ha 1st Ground, Polo.
Kat kum ki tyllong khubor kiba ïajan la ong ba kiba bun na ki dkhot ka council ki la kwah ban wanrah noh da u Myntri ka tnat ïalehkai barim jong ka Sorkar Jylla bad uba dei ruh u MLA ka Mawkynrew Constituency u Bah Banteidor Lyngdoh ba un shimti kum u President ba thymmai. Pynban ki don pat ki dkhot jong kane synjuk kiba dang kwah ban bteng biang u Bah Eugeneson Lyngdoh uba la mih bujli ha ka jaka u kpa.
La ong ba kane ka jingthmu ban wanrah ïa u Bah Banteidor ka long ban ïoh ïa ki lad jingïarap na ka Sorkar Jylla na ka bynta ki jingdonkam jong ka synjuk la ka long halor ka bynta kaba dangsah jong ka gallery kaba sha ka liang jong ka Wah Umkhrah lem bad kiwei ki jingdonkam.
Ha kaba ïadei bad ka kam Secretary, ki dkhot ka council ki la kwah ban wanrah noh da u Assistant Secretary uba dang bat mynta u Bah D.L Nongbri ba un shimti noh ïa katei ka kam na u Bah S.S Rapthap.
Te kumta lehse kane ka jingjied ïa ki nongkitkam kiba thymmai kan long kaba kham pher bad lah ruh ban ïohi ïa ki dur khmat kiba thymmai ki ban kit ïa ka lyngkor jong kane ka synjuk na ka bynta ban pyntyllun ïa ki kam ki jam jong kane ka synjuk ha kaba ïadei bad ka jingpynïaid ïa ka kam jingïalehkai phutbol manla u snem naduh ka Shillong Premier League, First, Second, Third bad ka Fourth Division lem bad ki lympung ïalehkai jong ki khynnah bad ki kynthei (Women’s League).
