Itanagar, Jymmang:
Ha kaba ïadei bad ka jingjam shakhmat ha ka jingpyntreikam, ki pulit jong ka Naharlagun da ka jingjop kaba khraw ki la lap biang ïa kawei ka briew kaba la 25 snem ka rta kaba la shah rahbor na ka shnong Mirzapur kaba hap hapoh ka jingkhmih jong ki pulit ka Raghopur ha Vaishali distrik jong ka Bihar bad kem ïa uwei u briew ba la tip kyrteng kum u Pintu Rai ha kaba ïadei bad ka jingdonkti ban rahbor ïa kane ka briew, la ïathuh u heh pulit.
Haba la ïoh jingtip halor ka jingjia, ki pulit ka Naharlagun ki la buh jingthoh bad thung ïa u Sub-Inspector B.P. Singh na ka bynta ka jingtohkit, la ong u Superintendent of Police jong ka Naharlagun u Mihin Gambo. Kumba la ïathuh la ong ba une uba la shah kynnoh u la pynbiej ïa kane ka kynthei bad kit ïa ka sha Bihar. Ka kynhun bakyrpang jong ki pulit ha ryngkat ka pulit kynthei, ki la shah phah sha Bihar bad da ka jingïatreilang bad ki pulit ka Bihar la lap biang ïa kane ka briew ha ka 22 tarik, Jymmang.
