Albuquerque, Jymmang:
Ha kawei ka jingjia la ong ba u nongñiah jong kawei ka liengsuiñ u la mynsaw jur hadien ba ka liengsuiñ thma F-35 ka la leit hap bakla hapoh Albuquerque jong ka New Mexico ha ka Sngi Ba-ar.
Ka tnat iada jong ka US ka la pyntip ba katei ka liengsuiñ thma kadei kaba la pynlut kumba $135 Million ban shna bad pynbit- pynbiang ia ka bad la pynher ia ka na Edwards Air Force Base jong ka Southern California kumba 1,100 Kilometre na Albuquerque. Katei ka liengsuiñ ka la leit hap ha ka por kumba 1:50 nohphai sngi jong ka Sngi Ba-ar.
Hadien ba la ioh jingtip shaphang katei ka khubor, ki heh ka tnat liengsuiñ bad na kiwei ki tnat ki bthah ban phah wad bniah bha halor kaei ka daw kaba la wanrah ia katei ka jingjia wat haba la pynlut bad thaw ia katei ka liengsuiñ ha ka rukom kaba pura bad paka.
U heh ka Albuquerque u la pynpaw ka jingsngewnguh ia ki kynhun iarap jong katei ka nongbah kiba la kloi-lan ban leit poi sha katei ka jaka tang mar ia ioh jingtip halor katei ka jingjia bad kiba la lah ban sei noh ia utei u pilot na katei ka liengsuiñ wat la u la mynsaw jur. Kumta u kyrmen skhem ba un ioh ia ka jingsumar kaba biang bad un khlaiñ noh ha ka jingstad ki nongsumar bad kumjuh ruh ryngkat ki jingduwai ki ban pynïoh bor shuh shuh ia ka met jong u.
