Seoul/Tokyo, Jymmang:
Ka North Korea ha ka Sngi Balang ka la pyntip ba u kor Satellite jong ka u la bthei noh tang shiteng suiñ katba dang kit ha u roket uba dang dep shna thymmai da katei ka ri.
Katei ka jingpyrshang leit buh kor satellite ka la long ruh tang hadien katto katne kynta ba ka Pyongyang ka la dep maham lypa ba hapoh jong u Jylliew, ka North Korea kan sa wanrah ia u ‘Spy Satellite’ ba ar hadien jong uwei pat uba ka la dep leit buh ha u Naiwieng mynshem snem.
Hynrei, la ong ba katei ka jingpyrshang jong ka North Korea ha kane ka sien ka la pulom noh hadien ba ki kor engine kiba la pyndait ha utei u roket ba dang shu dep shna kyrpang da katei ka ri, ki la bthei noh bad kaba la pynlong ia utei u kor satellite ruh ba un kem ding bad bthei lang ha ka jingbthei jong utei u roket ba la pynher bad pynkit ia u ha katei ka sngi.
Haba iadei bad kane, ki heh jong ka South Korea bad ka Japan ruh ki la pynbna ba katei ka jingthmu leit buh kor satellite jong ka North Korea ha kane ka sien ka la pulom noh namar ka jingbthei jong utei u roket uba kit ia utei u kor satellite ba ka North Korea ka thmu ban leit buh sha haw-haw khnang ba kan ioh ban syntiat bad ban peit-thuh ia ka jinglong jingman hapoh ri bad ki ri marjan. Na ka liang jong ka United States pat, ka la pynrem halor katei ka jingpynher ‘roket bad ka jingthmu lei tbuh satellite jong ka North Korea bad ong ruh ba ka North Korea ka la pynkheiñ ia ki kyndon aiñ ba la bun da ka United Nations Security Council.
