Shillong, Jymmang 29
Ka P. V Sindhu kaba la bat teng ïa ka nam lahduh ka la jam sha ka wat ba ar ha ka jingïakhun para marwei jong ki kynthei, hynrei u Lakshya Sen u la shah rem noh ha u rangïalehkai uba la bat ïa ka kyrdan ba nyngkong ha ka pyrthei u Viktor Axelsen ha ka Singapore Open Super 750 badminton tournament kaba la long ha ka sngi Balang.
Ka Sindhu ka la khur teng ïa ka nam lahduh ha ka BWF ha Singapore ha ki ar snem ba la lah bad ka la rung sha kane ka lympung hadien ba ka la wan ba-ar ha ka Thailand Open ha ka taïew ba la lah.
Ha ka jingïakhun pyrshah ïa ka Hojmark Kjaersfeldt uba na Denmark, katei ka nongïalehkai ka ri ka la lah ban khur ïa ka jingjop da 21-12 22-20 ha ka jingïakhun kaba la neh 44 minit ha ka wat kaba nyngkong bad kan pynkhreh ïa ka jingïakhun ka ban wan pyrshah ïa ka lahduh ha ka Rio Olympic ka Carolina Marin kaba na Spain.
Ka Marin kaba la bat ïa ka kyrdan balai ha ka pyrthei ka la lah ban jop da 11-5 pyrshah ïa katei ka khlur ïalehkai ka ri India. Kine ki ar ngut ki la ïakynduh teng ha ka Denmark Open ha kaba ka la ïohpdiang ïa ki yellow card.
U Lakshya uba don ha ka kyrdan ba 14 ha ka pyrthei, uba la ïoh ban ïalehkai nyngkong ha ka Olympic ha Paris, ka la ïakhun tyngeh hynrei u la mad ïa ka jingshah rem da 13-21 21-16 13-21 ha ka jingïakhun kaba la neh 62 minit pyrshah ïa u Axelsen, uba la khur jingjop nyngkong ha ka Thailand Open ha ka taïew ba la lah.
Kumjuh u Kidambi Srikanth u la shah rem noh ha ka wat kaba nyngkong da 14-21 3-11 ha u rangïalehkai na Japan u Kodai Naraoka.
Ha kiwei pat ki jingïakhun, u u B Sumeeth Reddy bad ka N Sikki Reddy ki la shah rem noh da 18-21 19-21 ha ki nongïalehkai ka Malaysia kata u Goh Soon Huat bad ka Lai Shevon Jemie ha ka mixed doubles, katba u Venkat Gaurav Prasad bad ka Juhi Dewangan ki la shah rem noh da 8-21 8-21 ha u Mads Vestergaard bad ka Christine Busch.
