Shillong, Jymmang 29
Ka Barcelona ka la thung ïa u manager barim ka Bayern Munich bad Germany u Hansi Flick kum u coach ba thymmai ha ka Sngi Balang bad kane ka jingïateh kular kan kut haduh u Jylliew 2026.
Kane ka la wan hadien ba ka jingshah weng noh u Xavi Hernandez ha ka taïew ba la lah hadien ba kane ka kynhun kam shym la lah ban rah nam lahduh ha ka lympung La Liga.
“Ka FC Barcelona bad u Hansi Flick ki la mynjur ïa ka jingïateh kular na ka bynta long kum u coach uba nyngkong na Germany ban shimti ïa kane ka kam ka ban kut haduh ka 30 tarik u Jylliew jong u snem 2026,” la pynpaw kat kum ka kyrwoh jong kane ka klob.
“Une u coach ba thymmai u la soh ïa kane ka kontrak ha ka shlem treikam jong kane ka klob ha kaba la ïadon lang u President ka FC Barcelona u Joan Laporta.”
U Flick, uba la lah ban pynurlong ïa ka kynhun ba khlaiñ bor na Germany (ka Bayern) ban rah bun tylli nam jop ha u 2020, u la long u coach uba nyngkong eh uba la shah weng noh na ka kynhun ïalehkai ka Germany ha u Nailur 2023 hadien ba kane ka kynhun kam shym la lah ban kynjoh sha ka thong.
Hynrei na ka liang ka Barcelona ka la don jingkyrmen skhem ba ka jinglah ban wanrah ïa une u coach kan long ka jingïarap ïa kane ka kynhun.
“Da kaba wanrah ïa u Hansi Flick kum u coach, ka FC Barcelona ka la jied ïa u briew uba tip bha na ka bynta ka kynhun jong u uba la lah ban kyntiew ïa ka klob (Bayern) bad ruh ïa ki lympung ïalehkai bar ri na ka bynta ban pynurlong ïa ka nam lahduh ha ka phutbol jong ka pyrthei hi baroh kawei,” la pynpaw ka kyrwoh.
Utei u coach ba la 59 snem ka rta u la ïoh ban sakhi ïa ki jingïalehkai jong ka Barcelona ha kane ka aïom bad u la don ka jingthrang ban shimti ïa kane ka kynhun naduh ba u Xavi u la pynpaw ba un mih noh na kane ka kynhun kaba kut ka aïom ha kaba ka la wan ha ka kyrdan ba-ar kata hadien ka Real Madrid, kaba la rah ïa ka nam lahduh ha ka lympung La Liga.
Wat la na ka liang ka Barcelona bad u Xavi ki la rai ba un ïasah haduh kaba kut ka aïom ka ban wan hynrei na ka liang u Laporta ha u Ïaïong u la kylla ktien na ka bynta abn weng noh ïa utei u rangïalehkai barim ha ka taïew ba la lah.
“Kam long kaba suk ia kane ka klob, kin ïakynduh jingeh bad kin hap ban long kiba ïai shah namar ka long ka kam kaba eh bha,” la pynpaw u Xavi.
Ka Barcelona ka la shah rem noh ha ka Champions League hadien ba ka la shah rem noh ha ka Paris Saint-Germain ha ka quarter-final.
