Beirut, Jymmang:
Ka tnat iada jong ka Syria ha ka Sngi Palei, ka la pyntip ba kawei ka khynnah ka la duh ia ka jingim na ka jingther bom jong ki shipai ka Israel sha ki bynta khappud jong katei ka ri bad 10 ngut pat ki la mynsaw lang ha katei ka jingjia.
Ki bor pyniaid ka Syria ki la iathuh ba ka Israel ka la thombor sha Syria na ka phang jong la Lebanon sha ka jaka ba don ka ïingmala ba shong ki paidbah hapoh ka nongbah Baniyas, ha kaba kitei ki 11 ngut kiba kynthup ia katei kawei ka khynnah kaba la khlad noh syndon ha katei ka jingjia.
Ka tnat Syrian Observatory for Human Rights ka la pyntikna halor katei ka jingjia bad ka la pyntip ruh ba ka jingdon kiba mynsaw baroh ka la kiew sha ka 20 ngut.
Kumjuh ka tnat ba dei khmih ha katei ka ri na Britain ruh ka la pyntip ba ka jingleit thombor jong ka Israel sha ki bynta phang pdeng jong ka Syria ka la shim ia ka jingim jong 3 ngut ki lehnoh ka Syria kiba iatrei lang bad ki lehnoh ka Lebanon kiba ioh jingkyrshan na ka kynhun lehnoh Hezbollah jong ka Iran bad kumjuh ruh ia 2 ngut pat ki lehnoh ki bym dei ki nong Syria hynrei kiba ïadon bynta lang ha ki kam jong katei ka kynhun lehnoh.
La ong ba ka tnat iada jong ka Syria ka la pyntip ba ki bor pahara ka ri ki la ioh ban tehlakam ia ka jingthmu thombor jong ki bor ba nabar hapoh ka nongbah Homs ha ka sngi ba la leit.
