New Delhi, Jymmang:
Ka jingai syrnod sha ki poiwir hapoh ki kyndon jong ka Citizenship (Amendment) Rules, 2024 ka la sdang sa ha jylla West Bengal bad mynta ka sngi, katto-katne ngut ki la ïoh jingmynjur na ka Empowered Committee, West Bengal ban long ki nongshong shnong bapura jong ka Ri India.
Ha u kyrwoh khubor na ka tnat Korbar Ri jong ka Sorkar Pdeng ha ka Sngi Balang, la ong ba ki Empowered Committee jong ka Haryana bad Uttarakhand ruh ki la ai syrnod nongshong shnong sha ki katto-katne kiba la pynbiang ïa ki kot ki sla katkum ki jingdonkam ba la kdew ha ka Citizenship (Amendment) Rules, 2024.
Lah ban kdew ba ka sien banyngkong ba la ai syrnod nongshong shnong sha ki poiwir katkum ki kyndon jong ka Citizenship (Amendment) Rules, 2024, ka dei ha ka 15 tarik Jymmang, 2024. Ïa kine ki syrnod la ai jingmynjur da ka Empowered Committee, Delhi, bad la sam da u Secretary ka tnat Korbar Ri ha ka jingïalang kaba la long ha Delhi.
Lah ban kdew ba ka Sorkar India ka la pynbna ïa ki kyndon Citizenship (Amendment) Rules, 2024 ha ka 11 tarik Lber, 2024.
Katkum kine ki kyndon, la batai kumno ki poiwir ki lah ban pan phah ïa ki kot ki sla ban pan ban long nongshong shnong jong ka Ri India. Ha kajuh ka por, la batai ruh ïa ki kyndon ba ki District Level Committee (DLC) kin hap ban bud haba ki peit bniah ïa ki kot ki sla ba la ai da ki poiwir. Nalorkata, la kdew kiei ki kamram jong ka Empowered Committee ha ki jylla kiba dei ban rai ïano ban ai ïa ki syrnod nongshong shnong. Ïa ki kot ki sla baroh hap ban ai lyngba ka rynsan ‘Online’ jong ka Sorkar India.
Ki poiwir kiba lah ban pan syrnod ban long nongshong shnong ka Ri India ki dei kito kiba la rung sha kane ka Ri shwa ka 31 tarik Nohprah, 2014 na Pakistan, Bangladesh bad Afghanistan, bad ki dei ban long ki Hindu lane Sikh lane Jain lane Buddhist lane Parsi lane Khristan. Ka jingwan phet sha India jong kine ki poiwir na kitei ki lai tylli ki Ri ka dei halor ka nongrim ba ki la shah ban beiñ na ka daw ka jingngeit ka jong ki.
