Guwahati, Jymmang:
Kiba bun ki bynta jong ki jylla kiba don shaphang Shatei-Lam-Mihngi, kynthup ka Tripura, Manipur, Mizoram, bad Assam (kaba don ha ka bynta ba shaphang Shathie), kim lah ban pynïasoh bad kiwei pat ki bynta jong ka ri lyngba ki lynti rel namar ba ki la shlei um, dap ktieh bad julor namar ka jingther jong u slap hadien ka jingwan lynshop jong ka ‘erïong Remal, la ïathuh ka tyllong khubor, ha ka Sngi Balang.
Ki heh jong ka Northeast Frontier Railway (NFR) ki la ong ba ki lynti rel ki la shlei um bad julor ha kumba 10 tylli ki jaka kiba don ha ki bynta jong ka New Haflong-Bandarkhal jong ka Lumding distrik ha Dima Hasao distrik jong ka South Assam namar ka jingther jong u ‘lapbah.
Ki la don kumba 36 ngut ki briew kiba la ïap na ki jingjia jong ka jingjur palat jong u slap bad ki jingtwa khyndew ha ki saw tylli ki jylla shaphang Shatei-Lam-Mihngi ha ka Sngi Ba-ar na ka jingwan lynshop jong ka ‘erïong Remal.
Ka rukom im jong kiba bun ki briew ha ki phra tylli ki jylla jong kane ka thaiñ ka la shah ktah jur khamtam kito kiba la ïakynduh jingeh na ki jingtwa jong ki surok, ka jingtwa ki ïing, ki jingshlei um bad ki jingjulor jong ki lynti rel bad kiwei pat ki jingjia kiba buh jingma ïa ki nongshong shnong, la ïathuh ki heh ba dei khmih halor kine ki jingshah pynjulor ha ki bor jong ka mariang.
Naduh ka Sngi Ba-ar ka NFR ka la pynsangeh treikam ïa kiba bun ki rel ba kit ïa ki nongleit jinglei bad ïa ki rel kit mar kiba dei ban pynpoi sha South Assam, Tripura, Manipur bad Mizoram.
