Maareb, Jymmang:
Ki lehnoh Houthi jong ka Yemen ha ka Sngi Balang ki la iathuh ba ki la ioh ban siat pynbthei sa ia kawei pat ka drone MQ-9 jong ki shipai US ha ka thaiñ Shathie-mihngi jong ka Maareb.
U nongrah ktien jong ka Houthi, u Yahya Sarea u la iathuh ba kane ka long ka sien ba hynriew (6) ia katei ka kynhun ban ioh siat pynbthei ne pynhap ia ka drone jon ka US naduh ba sdang jong ka thma ka Israel haduh kane ka kynti.
Ha ka 21 tarik u Jymmang, la ong ba ki lehnoh Houthi ki la ioh ban siat pynbthei ia kawei ka drone kaba leit poi bad iaid lyngba jong ka thaiñ al-Bayda sha ka phang South jong ka Yemen.
Kumta, la ong ba katei ka kynhun lehnoh Houthi ka dei kaba synshar hi ia ka nongbah jong ka Yemen bad kumjuh ruh ia ki thaiñ ba heh paid jong ka Arabian Peninsula. Bad la ong ba kitei ki lehnoh Houthi ki la ju thombor na ka por sha ka por ia man ki jhad kiba leit poi sha ki bynta jong ka duriaw Red Sea naduh u Naiwieng mynshem snem kum shi bynta ban pynpaw ia ka jingkyrshan jong ki sha ka liang jong ka kynhun lehnoh Hamas, kaba la shah hiar thma ha ka Israel namar ka jingleit thombor jong ka Hamas ha ka 7 tarik u Risaw mynshem snem (2023).
Kumta, haduh kine ki sngi la ong ba kitei ki lehnoh ki la dawa ia ka Israel ba ka dei ban sangeh noh ia ka jing-leit hiar thma sha Gaza namar ka jingshah ktah jur jong ki paidbah nong Gaza. Katba ka jingthmu ba shisha jong katei ka kynhun, kam long namar ba ka pyrkhat na ka bynta ki paidbah nongshong shnong ka Gaza hynrei namar ka jingshah thombor bad jingshah knieh jong ka Hamas ia k bor synshar na katei ka nongbah Gaza jong ka Palestine kaba la synshar hi da ka Hamas mynta da ki phew snem.
