Srinagar, Jymmang:
Ka Myntri Rangbah jong ka Jammu & Kashmir bad ka President jong ka seng PDP ka Mehbooba Mufti ka la shah pynngat ha ki kyndon aiñ halor ka jingpynkheiñ ïa ka Model Code of Conduct (MCC) da kaba pynlong ïa ka jingïakhih ha ryngkat ki nongbud jong ka ha ka sngi ba don ka jingthep vote ha Anantnag-Rajouri Parliamentary konstitwensi ha ka 25 tarik, Jymmang.
Ïa ka ejahar la pynngat da ki pulit hadien ka jingmudui jong u Assistant Returning Officer (ARO) Srigufwara Bijbehara. Ha ka jingmudui, u ARO u la pynshisha da kaba ong ba ha ka 25 tarik, Jymmang, ki la don shibun ki nongbud jong ka seng PDP ba la lamkhmat da ka Mehbooba kiba la ïalum ha Bijbehara bad pyrta da ki kyntien kiba pyrshah ban phah pyllait ïa ki nongbud jong ka seng PDP, ha kaba kane ka la wanrah ïa ka jingpynkheiñ ïa ka MCC.
“Kiba bun ki nongbud jong ka seng PDP ruh ki la khang lynti ïa ka surok bah ha ka por ba ki la pynlong ïa ka jingïakhih ha Bijbehara da palat shi kynta, ha kaba kane ka la long ka jingpynkheiñ ïa ka kyndon 144 CrPC ba la pyntreikam ha Anantnag-Rajouri konstitwensi da ka hukum jong u District Magistrate,” la ong ka jingmudui.
Ka la ong shuh shuh ba katkum ka jingtreikam jong ka kyndon 144 CrPC, ka jinglum jong saw ngut ki briew ka la long ka jingpynkheiñ ha ka por ba treikam ka MCC ba la buh haduh ka 4 tarik, Jylliew.
“Namar ka jingpynkheiñ ïa ka hukum, la kyrpad ba la dei ban pynshitom da kaba tyngeh halor ka jingpynkheiñ ïa ki kyndon pyrshah ïa ka Mehbooba Mufti bad ïa ki nongbud jong ka ïa kiba la ithuh da ki pulit”.
Hadien ka jingmudui ba la phah da u ARO, ka Police Station Bijbehara ka la buh jingthoh halor ka jingujor ejahar bad pynngat hapoh ki kyndon 147, 188, 341 bad 126 jong ka Representation of People Act hapoh ka 1950, 1951, bad 1989 pyrshah ïa ka Mehbooba.
Kum shi bynta ban pynphai ktien kylla halor kane ka jingshah ujor ejahar kaba long pyrshah ïa ka, ka Mehbooba ka la ong ba ka long kaba sngewsammut ban buh da ka jingujor ejahar pyrshah ïa ka namar ka jingpynkheiñ ïa ka MCC.
