United Nations, Jymmang:
Katkum ki khubor, la ong ba ka United States ka la rai ban ym leit iadon bynta ha ka jingpyndon burom jong ka United Nations (UN) ia u nongialam barim ka Iran- u Ebrahim Raisi, uba la khlad noh mynta u bnai namar ka jingleit hap bakla jong ka liengsuiñ ha kine ki khyndiat sngi ba la leit.
La ong ba ka kynhun 193 jong ka U.N. General Assembly ka la pynlong ia ka jingiakynduh lang ban pyndon burom ia utei u nongialam ka Iran uba la khlad kyndit ha katei ka jingjia kaba sniewbok. Ha katei ka jingleh burom, la ong ba kin iakren ruh halor katto katne shaphang utei u nong-ialam ka Iran uba la ialam bad kyntiew ia ka Iran katkum ba ka long mynta.
La ong ba u Raisi, u long u nongialam uba la shah thung pateng ha ka jaka jong u nongialam ba don bor tam jong katei ka ri ha kip or ba la leit- u Ayotollah Ali Khamenei. Hynrei la ong ba u Raisi u la khlad noh hapdeng ka jingthud jong ka liengsuiñ kaba u shong katba u dang poi ha khappud jong ka nongbah Azerbaijan ha ka 19 tarik u Jymmang.
Ka UN ha katei ka sngi ka la ong, ba ka United Nations ka long ryngkat bad ki paidbah ka Iran khamtam ha kum kane ka por ba ki la duh noh ia u nongialam ba hakhlieh duh jong katei ka ri.
