Chennai, Jymmang:
U Myntri Rangbah jong ka Tamil Nadu u MK Stalin un sa ïashim bynta ha ka jinglang jong ka kynhun synrop INDIA ha ka 1 tarik, Jylliew ha New Delhi na ka bynta ban ai ïa ka rai ha kaba ïadei bad kawei pat ka jingthmu pyntreikam.
U Stalin un sa mih na ka bynta ban leit sha ka nongbah Delhi ha ka 1 tarik, Jylliew.
Kane ka jingïalang ka long kaba kongsan naba ka la long hapdeng khyndiat sngi shwa ban pynbna ïa ki nongjop ha ka jingïakhun ïa ka ilekshon Lok Sabha.
Ka tyllong khubor kaba la wan na ka seng DMK ka la ong, “Kam pat paw shai la ïa kane ka jingïalang yn sa pynlong ha ka 1 tarik, ne ka 2 tarik, Jylliew, naba ka Myntri Rangbah jong ka West Bengal ka Mamata Banerjee ka la pynpaw ïa ka jingbym lah ban ïa donlang ha ka jingïalang namar ka jingdon jong ka bynta kaba khatduh jong ka ilekshon ha ka jylla jong ka bad namar ka jingïai bteng ha ka ban pyndep ïa ki kam ba ïadei bad ki jingai jingïarap sha ki lanot kiba la ïakynduh jingeh na ka jingkhie ka ‘erïong Remal.”
Ha kaba ïadei bad kane, u General Secretary jong ka DMK u Duraimurugan u la pynbna ba ïa ka jingïalang ka ban pynlong da ka ‘Online’ jong ki District Secretary jong ka seng bad ki kyrtong jong ka seng na ka bynta ka ilekshon Lok Sabha bad ki nongïarap ha ki jaka thep vote yn sa pynlong ha ka 1 tarik, Jylliew.
