Shillong, Jymmang 31
Ka Borussia Dortmund kan pynkhreh ban ïakhun pyrshah ïa ka kynhun kaba khlaiñ bor na Spain ka Real Madrid ha ka final jong ka Champions League ka ban long ha ka step synñia jong ka Sngi U Blei ha Wembley. Ka Real Madrid ka la khmih lynti ban khur ïa ka nam lahduh kaba 15 ha kane ka lympung. Haduh mynta ym don napdeng ki klob ki ban don ha ka thong ban kynjoh kumba long katei ka kynhun ban khlaiñ bor na Spain.
Kane ka kynhun jong u Carlo Ancelotti ka la lah ban pynkhyllem noh ïa ka lahduh barim ka Manchester City na ka bynta ban khur ïa ka jingjop ha ka quarter-final lyngba ka tie-breaker hashwa ba kan ïakhun tyngeh ha Santiago Bernabeu na ka bynta ban pynliem sa ïa ka Bayern Munich ha ka semi final.
Te kumta kane ka lahduh ha Spain ka la leit sha Wembley da ka jingkyrmen kaba skhem na ka bynta ban pynsah kynmaw ha ka jingïaid lynti jong ka ha kane ka lympung.
Kumba ka paw ka Madrid ka la shah rem tang ar sien ha ki 54 sien jong ki lympung ïalehkai bapher bapher, ha kaba ka la lah ban khur ïa ka nam lahduh ha ka La Liga da kaba tam haduh 10 point bad ka la lah ban pynliem ruh ïa ka Barcelona da 4-1 kol na ka bynta ban rah ïa ka Spanish Super Cup.
“Nga la wan ha kane ka jaka da ka jingthmu ban khur ïa ka jingjop,” la pynpaw u rangïalehkai shapdeng ka Madrid u Jude Bellingham, uba la mih noh na ka Dortmund na ka bynta katei ka kynhun kaba na Spain ha ki 12 bnai mynshwa.
Ha ka kam ïalehkai u Belling-ham u la sdang ban kiew ha ka kam ïalehkai lyngba ka Dortmund.
Une u rangïalehkai u la sdang ïa ka kam ïalehkai ha ka por ba u dangkhynnah ha ka lympung Championship na ka Birmingham, hynrei ka kam ïalehkai jong u ka la nangïai paw hadien ba u la pynïasoh sha ka kynhun ïalehkai ba khlaiñ bor na Germany hashwa ban un pynïasoh sha ka Madrid ha ka jingsiew kaba 100 million euros ($109 million).
Kumba ka paw ka Dortmund ka la ïakynduh jingeh ha kane ka aïom ha kaba ka la wan ah ka kyrdan ba san ha ka lympung Bundesliga, ha kaba ka la duna haduh 27 point ïa ka Bayer Leverkusen, kaba long ka lahduh ha kane ka lympung.
