Washington, Jymmang:
Ki heh ka United States ha ka Sngi Palei ki la pynbna sa ia kawei pat ka mat kaba ap jingma ia ki paidbah hadien ba uwei u nongri jingri u la ioh kem ia ka jingpang ‘Bird Flu’ na ka jingiatyngkhuh kam bad ki jingri kiba la shah ktah ha katei ka jingpang khlam. La ong ruh ba kane ka long ka sien kaba lai (3) ban shem ba katei ka jingpang ka lah ban pur wat sha ki briew namar kham ñiar eh ban ïohsngew ba katei ka jingpang kan pur wat sha ki mrad ki bym dei ki jait sim.
Hynrei la ong ba ha kine ki sngi, la iohi ba wat ki briew ruh ki ngat bad shah ktah ha katei ka jingpang khlam ki sim bad ka sien kaba ar ba la sakhi ia kane ka long ha u Iaiong, hadien ba uwei u nongri jingri hi u la ioh kem ia katei ka jingpang bad utei u nongrep u dei na ka nongbah Texas.
Kumta, ka tnat Centers for Disease Control & Prevention (CDC) ha katei ka sngi ka la pynbna ba katkum ka jingkheiñ ba la ioh ban buh da katei ka tnat, la shem ba ki la don haduh 3 ngut kiba la shah ktah ha katei ka jingpang khlam ki sim ha une u snem.
Hynrei, la ong ba ka long ka sien ba nyngkong ban iohi syndon wat ia ki dak jingshitom jong katei ka jingpang khlam ba kin paw shabar ha ka met jong u briew naduh ki jingshitom ring mynsiem bad kiwei kiwei de kiba long hi ki jait jingshitom ba ki mrad ki ju pynpaw haba ki ioh ia katei ka jingpang ‘Bird Flu’.
