Karachi, Jymmang:
Ki bor pyniaid ka Pakistan ha ka Sngi Balang ki la pyntip ba ha ka miet Sngi Ba-ar, 4 ngut ki nong Pakistan ki la duh ia ka jingim na ka jingthombor ki shipai ka Iran sha ka phang Shathie-mihngi jong ka nongbah Balochistan jong ka Pakistan.
Kane ka la jia ha ki bynta khappud jong ka Pakistan bad ka Iran, kaba hap ruh hapoh ka distrik Washuk jong ka Pakistan, la pyntikna u heh pulit Umar Jamali jong ka Pakistan.
Kumjuh ruh u heh pulit ka Washuk, u Naeem Umrani, u la ong ba ka tnat iada jong ka Pakistan ka dang phah wad bniah ban lap ia ka daw tynrai jong katei ka jingjia ha katei ka sngi.
U President barim ka Iran – u Ebrahim Raisi u dang shu dep wan jngoh shen sha Pakistan ha u Iaiong. Hapdeng kane jingleit jngoh ba lai sngi sha katei ka ri ba marjan bad kaba long ruh ka ri kaba ïasyriem ha ka rukom im bad rukom ngeit namar kitei baroh ar tylli hi ki dei ki ri ba heh paid jong ki jaitbynriew Muslim. Hynrei la ong ba katei ka jingleit jngoh jong utei u heh ka Iran ha kine ki bnai ba la leit, ka long ban wanrah noh ia ka jingiasuk bad ban pynjai-jai ia ka jingiakynad hapdeng kitei ki arliang ri kaba la neh mynta la slem khamtam ha kitei ki bynta khappud jong ka Pakistan bad ka Iran.
Namar ka Iran bad ka Pakistan ki don hapdeng ka jingiashun bad jingiakynad kaba la neh slem bha, hynrei ka jingther ‘namding ha u Kyllalyngkot mynshem snem, ka long kaba kham shyrkhei tam napdeng baroh ki jingjia kiba la jia ha kiwei pat ki snem ba la leit.
Hynrei, na ka liang ki nongialam jong baroh arliang ri ki la pynpaw ia ka jingsngew khia halor katei ka jingiakynad jong ki shipai kitei ki arliang ri na shiliang sha shiliang khappud bad kumta ruh ki la ialeh katba lah ban pynneh ia ka jingiadei para marjan ri bad ban burom ia ki kyndon bad ki aiñ jong kawei sha kawei pat ka ri.
