Shillong, Jymmang 31
Hadien ba la kut ka samoi treikam, ka Shillong Sports Association (SSA) kan pynlong ïa ka jingïalang na ka bynta ban jiedbiang ïa ki nongkitkam bathymmai mynta ka Sngi Saitjaiñ ha Conference Hall jong kane ka synjuk.
Wat la ha kane ka kynti kaba mynta ka SSA ka la pynkhreh ban wanrah da ki ‘riew saiñ pyrthei khnang ban ïoh ïa ki jingmyntoi na ka Sorkar Jylla lyngba ki skhim bapher bapher kiba ïadei bad ki jingmaramot ïa ki bynta kiba dangsah jong ka SSA Stadium kaba ha 1st Ground Polo. Hynrei ka jingkylli na kiba bun ka long hato kane ka synjuk ïalehkai kan kyntait noh ïa u President uba long ruh u khlur ïalehkai barim, u Bah Eugeneson Lyngdoh, uba la wanrah ïa ka nam bad ka burom ïa ka Jylla hi baroh kawei lyngba ka jingnoh synñiang ha ka kam ïalehkai bad uba la ïoh ban mihkhmat ïa ka ri India ha ki lympung ïalehkai bar ri.
U Bah Eugene u la shimti ïa ka kam President jong ka SSA hadien ka jingkhlad noh u kpa (L) Bah S.K Sunn.
Kat kum ka jingïakren na ki katto katne ki ‘riew ïeit phutbol ki la pynpaw ba ka SSA ka dang dei ban dang pynneh ïa u Bah Eugene namar u dei uba la wanrah ïa ka nam bad ka burom jong ka Jylla ha ka kam ïalehkai phutbol. “Wat la ha ka kam pynïaid phutbol donkam ïa ki lad jingïarap na ka Sorkar Jylla, hynrei kum ka synjuk kam dei ban klet ïa ki nongïalehkai kiba la noh ïa la u synñiang ha ka kam ïalehkai phutbol bad ka kam jong ka hi ka dei ban kyntiew ïa ki nongïalehkai ka Jylla da kaba pynlong ïa ki lympung ïalehkai phutbol bapher bapher,” la pynpaw uwei na ki riew ïeit phutbol.
Lah ban pynpaw kham ha shwa ki tyllong ki la ïathuh ba na ka liang kiba bun ki dkhot ka council ki la kwah ban wanrah noh da u Myntri ka tnat ïalehkai barim jong ka Sorkar Jylla bad uba long ruh u MLA ka Mawkyn-rew Constituency u Bah Banteidor Lyngdoh ba un shimti kum u President bathymmai, hynrei ki don pat na ki dkhot kiba la dangkwah ban dangbteng biang u Bah Eugene.
La ong ba kane ka jingthmu ban wanrah ïa u Bah Banteidor ka long ban ïoh ïa ki lad jingïarap na ka Sorkar Jylla na ka bynta ki jingdonkam jong ka synjuk la ka long halor ka bynta kaba dangsah jong ka gallery kaba sha ka liang jong ka Wah Umkhrah lem bad kiwei ki jingdonkam.
Ha kaba ïadei bad ka kam Secretary, kiba bun ki dkhot ka council ki la kwah ban wanrah noh da u Assistant Secretary ba mynta u Bah D.L Nongbri ba un shimti noh ïa katei ka kam na u Bah S.S Rapthap.
Te kumta lehse kane ka jingjied ïa ki nongkitkam bathymmai kan long kaba kham pher na ka bynta ban ïakit ïa ka lyngkor jong kane ka synjuk na ka bynta ban pyntyllun ïa ki kam ki jam jong kane ka synjuk ha kaba ïadei bad ka jingpynïaid ïa ka kam jingïalehkai phutbol manla u snem naduh ka Shillong Premier League, First, Second, Third bad ka Fourth Division lem bad ki lympung ïalehkai jong ki khynnah bad ki kynthei (Women’s League).
