New Delhi, Jymmang:
Ka ïingbishar Metropolitan ha Delhi ha ka Sngi Palei ka la ai ïa ka rai ban phah set 14 sngi na ka bynta ban pynlong ïa ka jingtohkit ïa u trai bad u doktor uba don ha ka kam jong ka hospital ki riewshimet ha kaba la jia ka jingpluh ding ha ka 25 tarik, Jymmang, la ïathuh ka tyllong khubor. Kane ka jingpluh ding ka la shim ïa ka jingim jong ki 7 ngut ki khyllung ba dang kha bad pynmynsaw ïa 5 ngut kiwei pat.
U Chief Metropolitan Magistrate u Vidhi Gupta Anand u la phah ïa u Dr Naveen Khichi, uba long u trai jong ka jaka ai jingsumar bad ïa u Dr Aaksh, uba la don ha ka kam ha ka por ba jia ka jingjia ha ka sngi Saitjaiñ jong ka taïew ba la lah, sha patok na ka bynta ban shah tohkit bniah halor ka jingjia.
Kine baroh arngut ki la shahkem naduh ka sngi U Blei bad ki la shah set ha ki pulit ha ka 27 tarik, Jymmang. U doktor u la buh da ka jingkyrpad jamin ha kaba ïa kane ka jingkyrpad la buh ban bishar bniah ha ka 3 tarik, Jylliew, la ïathuh shuh shuh ka tyllong khubor.
Kumba ka la jia, la ong ba ka jingjia jong ka jingpluh ding kaba jur ka la jia ha ka miet jong ka sngi Saitjaiñ ha Baby Care New Born Child Hospital ha Vivek Vihar kaba don ha Delhi.
Kumba la pynshisha la ong ba kane ka Hospital ka dei kaba la pyntreikam beaiñ da ka Licence ka bym treikam shuh bad khlem ka jingïoh ïa ka rai na ka Fire Department ba kan long ka jaka ai jingsumar kaba bit na ka bynta ban sumar ïa ki nongpang.
